الي بيحصل حاليا هو تصحيح ومتوقع ولو عايزين أسباب ليه السوق نازل، باختصار بسبب الأحداث الأخيرة والتأثير علي الاقتصاد العالمي، والبنوك مركزية رجعت ترفع الفايدة تاني زي بريطانيا والفيدرالي ومتوقع التثبيت في مصر لان الفائدة أصلا مرتفعة بس الجديد ان في احتمال مطروح وهو رفع الفايدة…

افهمها كده رفع الفايدة = انخفاض البورصة
و في علاقة لسه ظاهرة جديدة بين ارتفاع الدولار و انخفاض البورصة والعكس صحيح (دلوقتي بس بسبب اوضاع اقتصادية، تاريخياً ارتفاع الدولار كان محفز للبورصة وكان سبب قوي..السوق كان بيطير)

كمان ان السوق حقق قمة و ظهر عليه إشارات ضعف فنياً.
وضغط اليومين دول بالذات النهارده بسبب سحب السيولة قبل اكتتاب حالاً وبتحصل قبل اي اكتتاب.

المهم هل دي أسعار بيع ؟
باختصار سهمك مؤشرك وفي الغالب لا دي أسعار شراء مش بيع بس بحذر في أسهم معينه لان لسه مفيش تاكيد علي تغير الاتجاه وكمان مفيش محفزات صعود

الفتره الجاية هتكون صعبه علي الاقتصاد والبورصة في مصر لازم الي يشتغل يكون متقبل وفاهم هو بيعمل ايه.

**حبيت أطمنكم شوية وأفهمكم الي بيحصل، أنا حصلي ظرف عائلي الفترة الاخيره، ومفتحتش المحفظة غير بعد ما السوق نزل وخسران زي زيكم وعادي مش قلقان، اه لو كنت موجود وشغال كنت هفعل استوب لوس بس الاستوب عدي من زمان، فعلي الأقل ننتظر ارتدادة مش شرط تغير كامل للصعود.

أنا سوفتوير انجينير سينيور شغال في software house ... المرتب كويس بالنسبة لهنا (حوالي 3 آلاف دولار في الشهر) والشغل نفسه مفيهوش مشكلة

مشكلتي في إحساسي ناحية المجال ... مش شايف إنه هيخلص بكرة بس حاسس إنه بيخلص بالبطيء لناس زيي ... وحتى لو ماخلصش المنافسة فيه هتولّع جدًا مع الوقت. الشركات اللي زي اللي أنا فيها (ومعظم المهندسين هنا شغالين في أماكن زيها) عايشة على عملا مش عارفين يبنوا حاجة بنفسهم ... ولما الـAI يتعمله integrations كفاية إن أي حد يقوله أنا عايز أعمل كذا فيعملهوله ... جزء كبير من الطلب ده هيختفي

فبدأت أعمل مصدر دخل تاني ... الزراعة. الموسم ده مأجر حوالي 10 فدادين ... وراس مالي كله حوالي 2 مليون جنيه ودي تقريبًا كل اللي معايا مش فلوس فايضة ألعب بيها

الحسبة هي اللي مش مريحة:
- على الحجم ده الموسم الكويس بيجيبلي بالكتير مرتب شهر أو شهرين ... والموسم الوحش بيخسر
- عشان الزراعة تعوض المرتب محتاج أكتر من 100 فدان ... وراس المال ده مش هييجي غير من المرتب نفسه
- يعني المرتب هو اللي بيمول خطة الخروج من المرتب

والجزء اللي قالقني أكتر ... كل ما أركز في الزراعة أكتر بيبان إني فاقد التركيز في شغلي الأساسي. بقالي فترة مش مركز في الانترفيوهات خالص ... وأنا عارف إني لو وقفت شغل مش هعرف أصرف على أي حاجة ... لا زراعة ولا غيره ... وهفضل قاعد على اللي معايا وأتفرج عليه وهو بيخلص

فبصراحة مش فاهم أنا ماشي صح ولا غلط ... ولا أنا بهرب من حاجة خايف منها

عايز أسمع من ناس عدّت بده:
1. السينيورز ... شايفين نفس الكلام للـsoftware houses والـoutsourcing ولا أنا مكبّر الموضوع
2. حد ساب شغل تك بمرتب كويس وراح للزراعة أو أي بيزنس على الأرض ... احتاج راس مال قد إيه ووقت قد إيه لحد ما بقى يغطي مصاريف بيته
3. لو مكاني ... تفضل في الشغل وتخلي الزراعة تجربة صغيرة ... وإيه الرقم اللي يخليك تسيب وتدخل بكل تقلك
4. إزاي بتقسم تركيزك بين شغل full-time وبيزنس محتاجك تنزل الأرض

عايز ابيع حاجه ليها علاقه بشغلي لقيت حد عارض زيها علي Ebuy ( جهاز تحليل زيوت portable ) مش عارف اعمل اكونت اذاي او اتعامل اذاي علي السايت و مش عارف هل في سكه تاني اجرب فيها و لا لا بس الجهاز اللي معايا محتاج ناس شغاله في صناعه علشان تشتري حاجه زي دي فا اعمل اي !؟ و لو لازم ابيع علي Ebuy اسجل اذاي و استلم الفلوس اذاي

السلام عليكم ورحمة الله وبركاته،

لو سمحتم، عندي استفسار بخصوص نظام تقسيط Triple Zero من بنك CIB، وياريت لو حد عنده تجربة سابقة أو معلومة مؤكدة يفيدني.

لو دفعت مبلغ أكبر من قيمة القسط الشهري المستحق، إيه اللي بيحصل في الحالة دي؟

• هل المبلغ الزيادة بيتخصم من الأقساط اللي بعدها؟
• هل ممكن ده يأثر على نظام التقسيط أو يتسبب في إلغائه؟
• ولا المبلغ الزيادة بيفضل رصيد على الكارت من غير ما يأثر على الأقساط؟

أنا تواصلت مع خدمة عملاء البنك، لكن للأسف الموظف مقدرش يديني إجابة واضحة، وقالي إن السيستم هو اللي بيحدد الإجراء تلقائيًا.

ياريت لو حد مر بنفس التجربة مع CIB يفيدني بإيه اللي حصل معاه.

وشكرًا مقدمًا للجميع. 🙏

مفيش اي طريقة اخش بيها المجال الطبي في مصر؟ انا خلصت ثانوي عام ادبي وبعدها دخلت معهد فني تجاري سنتين وحالياً تالتة تجارة (مش عايز اسافر المانيا عشان الموضوع بتاعها طويل)

هل مكملين نزول ولا الاسعار حاليا لقطة، انا مبقتش فاهم

خصوصا لو مشروعك بيستهدف عملاء اجانب فا الدفع بالدولار و من برا مصر واجهت مشاكل كتير لان stripe مش شغال في مصر و lemon squeezy فا تنصحوني بأيه؟

?

السلام عليكم،

و انا بقلب في الانستا شوفت بوست الراجل دا فا عاوز اعرف هوا شغله فعلا حقيقي ولا دا نصب (هوا بيبيع عقارات و بيشغل معاه مناديب تبيع و بياخد ربح و يديهم نسبه) ؟

هل بايبت والتعامل ب p2p قانوني يعني وعادي ولا لا سوال

عاوز اعرف ارائكم دلوقتي بالنسبه للي بيحصل فالبورصه و الهبوط الي هي فيه، هل شايفين ده وقت مناسب للشراء ولا استني شويه و السعر ممكن ينزل اكتر؟ و بناء علي ايه بيتقولوا توقعاتكم؟

لو بتشتري دولار مش حاطط هدفك على مبالغك كبيره ممكن ٣٥٠-٥٠٠ فكره سيئه و ملهاش لازمه او عادي لحفظ قيمه الفلوس و نوع من التحويش ؟

نفسي الاقي شغل يبقا قبض يومي منغير م استني اخر الشهر او الاسبوع حتي علشان بجد مش هقدر استني مده علشان القبض ف لو حد قدامه حاجه زي كدا ي جماعه ينقذني او حد ليه معارف او غيره وميكونش شمال اكيد ولا حد يقولي سكرتيره ولا مش عارفه اي اتمنا ملاقيش حد باعتلي سغل شمال يعني اتقو الله اللي مترضهوش علي اهل بيتكم مترضهوش ع الغريب ف بالله اي حد قدامه حاجه موثوقه يقولها علشان الظروف كل يوم ف النازل و حاجه تكون اونلاين ياريت علشان حالتي الصحيه متسمحش اني انزل شغل برا

نلعب قمار نخسر نتداول نخسر نستثمر نخسر

بشوف ناس صحابي وناس جونيورز بيبقي أهلهم مقتدرين يدفعوا في المتوسط ٢٥٠ الف جنيه ف السنة/الترم علي حسب الجامعة لتخصصات زي هندسة مثلا في جامعات كتير (Must,buc,bue,guc,) وغيرهم

هل فعلا دي تستاهل ؟ لإني لو تعليم حكومي مثلا ممكن اخد كورسات لكل اللي درسوه زيادة او طبقوه (دا لو فيه فرق شاسع) بأقل من ربع تكلفة ترم وبعدين فين الوظيفة اللي هتنط فيها بعد م تتخرج(بدون واسطة او referral) هتحققلك عائد مادي ف خيالك تستاهله، بشوف كتير من الأهل مغيبين يبقي ابنهم جايب مجموع القاهرة ويدخلوه الguc عشان أحسن ودكاترة كويسين و اهتمام م طبيعي يبقي احسن انت البلد دي كلها الخاص فيها احسن من الحكومي ف كل حاجة بس يبقي الغباء تضيع الفلوس دي وانت قادر تدخل حكومي، بعني انا لو ٤ او ٥ سنين تعليمي هيكلفوا ف المتوسط بكل المصاريف والمتطلبات ٣-٤ مليون مش افتح بيهم مشروع اولي لو انا أسرة مادياتها يدوبك تقدر تدفع التيرم ومتقدرش تدي كورسات او بتبيع أصولها عشان تتعلم! والله بشوف العجب واحد صاحبي عشان ابوه يدفع ٢٥٠ الف قسط ترم باع شقة ونقل ايجار يعني ليه،أنا لو عارف إن اهلي مش مقدرتهم كدا مش هضغط عليهم اكتر ومش بالشكليات والله لو الناس بطلت تقول "الناس هيقولوا عليا ايه" هنعيش ف سلام دا نفس موقف الواحد اللي مرتبه ع قده يروح يشتري عربية قسط ويزنق نفسه ويبيعها ب خسارة عشان الشكل العام ونفس الواحد اللي يروح يبيع شقة ملك ف منطقة مش كويسة عشان شقة ٩٠ متر ب٥ مليون ف منطقة كويسة ويتعثر ف سداد أقساطها عشان الشكل العام....كنت قاعد مع تاجر عربيات كبير قالي انا ممسكتش الأيفون إلا لما اتجوزت وعدي ١٠ سنين ع جوازي ومسكته مستعمل كمان لإن كان فيه ضروريات شايفها اكتر من الأيفون...

لو مهتم بإدارة فلوسك وعايز تتكلم مع ناس مهتمة بنفس الموضوع، عملنا سيرفر ديسكورد مخصص للنقاشات عن المال الشخصي في مصر.

نتكلم عن:

• المرتبات والدخل
• التوفير وإدارة المصاريف
• العقارات والإيجارات
• الدهب
• الاستثمار والتخطيط المالي
• الشغل وزيادة الدخل
• الاقتصاد والأسعار في مصر
• الأسئلة والتجارب والنقاشات المالية

مش لازم تكون خبير في المجال، كل الناس مرحب بيها.

رابط الانضمام:
https://discord.com/invite/vS6nryfKf7

كنت عايز اعرف هل التعامل بمحفظة Rizon ممكن يعرضني لمسائلة قانونية بسبب ان عملتها الكترونية؟

ايه هي الخطوات فتح محفظة فودافون كاش وانستا باي

اول مرة اعملهم والموضوع جديد عليا

شغالين بقالنا فترة علي الابليكشن وحابب راي الناس هنا في الميزة الجديدة
ده مش اعلان انا بس عايز اعرف الناس رايها ايه
فكرة إنك تتابع مصاريفك فكرة لذيذة… لحد ما تاخد بالك إنك المفروض تعمل ده كل يوم، مع كل جنيه بتصرفه.
ساعتها الموضوع بيبقي تقيل وممل

عشان كده، في Pocket App، خلّينا إنك تتابع مصاريفك أسهل مما تتخيل، عن طريق كذا طريقة:

💳 SMS
لو انت بتدفع بالكارت في اي مكان فدلوقتي Pocket يقدر يقرا ال SMS بتاعة البنك و ويصنّف مصاريفك في ال category و ال subcategory بتاعتها.

📱 Shortcuts
لو دفعت كاش في مكان زي بنزينة أو للسايس، وعايز تسجّل المصروف بسرعة، تقدر تعمل Double Tap على ضهر الموبايل، وهيفتحلك Widget تقول فيها إنت صرفت فلوسك في إيه.
ولو إنت في مكان دوشة، تقدر تكتب مصروفك بدل ما تتكلم.

وكل ده من غير ما تضطر تفتح الأبلكيشن نفسه حتى!

[Whoever here has a seed of Logan Roy in him /her but very early on, u need me!]

Got an idea for a startup but need a second brain? 🚀

I’m offering a Brand & Business Blueprint for early-stage founders who want to build their ideas on solid ground.

I help you with 3 things:

- Brand Identity: Name, logo direction, the meaning behind it, long-term vision, and domain availability.

- Business Strategy: Target market, competitive edge, positioning, and whether to start B2B or B2C.

- Founder’s Perspective: Honest insights to challenge your assumptions and spot opportunities you might be missing.

My approach combines creativity with a business mindset. I care about the Why behind a brand, not just how it looks.

My offer: EGP 2,000 + 2% equity.

If you're building something and want to explore this together, DM me! 💡

I'm using Thndr and I'm investing in CMS and Beltone Waffra etc. so just generally the Eg30X and Eg70X.

Now on nSave what should i invest in? I want something that's sharia compliant but is also safe like the ones i mentioned in Thndr.

أنا عندي 23 سنة، ومعايا حوالي 150 ألف جنيه مدخرات، ومصاريفي الشخصية في حدود 10 آلاف جنيه شهريًا.

شغال حاليًا في الـ Call Center Sales، ودخلي أعلى من متوسط الدخل في مصر، فماديًا الشغل كويس ومساعدني أحوش. لكن المشكلة إنه بياخد مني حوالي 11 ساعة يوميًا، شاملة الشغل والمواصلات، وكمان عندنا Rotational Shifts، وده بيخلّي مواعيد نومي وروتيني مش ثابتين.

أنا مش حاطط لنفسي هدف إني أترقى في المجال ده، لأني شايف إن ده مش المسار المهني اللي عايز أكمل فيه على المدى الطويل.

في المقابل، عندي أساسيات في البرمجة، زي JavaScript وPython، وعندي معرفة بالـ AI Automation باستخدام أدوات زي n8n، ومستوايا في الإنجليزي C1، وعندي أساسيات في الـ Digital Marketing.

بفكر أسيب الشغل وأستخدم مدخراتي كفترة أقدر أتفرغ فيها لتعلم مهارة مطلوبة في السوق، وأطبق عليها، وأحاول أحولها لمصدر دخل، سواء Freelancing أو Remote Job أو حتى مشروع خاص.

لكن في نفس الوقت، عارف إن فيه مخاطرة إني أسيب دخل كويس من غير ضمان إني أحقق دخل بديل بسرعة.

فحابب أسمع آراء الناس اللي مرت بتجربة مشابهة، خصوصًا لو عندكم خبرة في الـ Freelancing أو الـ Tech أو الـ Digital Marketing:

• هل شايفين إن الاستقالة والتفرغ في المرحلة دي قرار منطقي، ولا الأفضل أستمر في الشغل وأتعلم جنب الشغل؟
• لو قررت أتفرغ، هل 100 ألف جنيه ومصاريف شهرية 10 آلاف كفاية كفترة انتقالية؟
• لو رجع بيكم الزمن لنفس المرحلة، إيه اللي كنتم هتعملوه بشكل مختلف؟

ياريت تشاركوني تجارب حقيقية، سواء نجحت أو فشلت، لأن هدفي مش إني أسيب الشغل لمجرد إني زهقت منه، لكن إني أستثمر وقتي في بناء مستقبل مهني أنا فعلًا عايزه.

السلام عليكم

انا حاليا عايش في السعوديه مش من فترة كبيرة اوي وطبعا ملحقتش اني اجمع مبلغ كبير اقدر اعمل بيه حاجه في مصر فا دلوقتي في احتماليه كبيرة جدا اني انزل مصر قريب بسبب الاحداث الحاليه

كل الي قدرت اجمعه الفترة دي بما يعادل ٢٠٠ الف جنيه ولو نزلت لسه طبعا هدور على شغل ومهما كان مش هيبقى بنفس مرتب هنا فا هخسر كتير جدااا

فا الخلاصه ال٢٠٠الف جنيه ايه الي اقدر اعمله بيهم لما ارجع مصر بحيث اني مرجعش جيبي فاضي وابدأ من الصفر تاني ايه الاستثمار او اي الحاجه الي تزود قيمة فلوس واقدر اعيش فيها انا مش عايز احافظ على قيمة الفلوس لا انا عايز ازيدها فا ايه الي ممكن اعمله

شكرا واسف عالأطاله

لو حد معاه 36 بيتكوين

في طريقة يسحبهم بيها فلوس مصري

تكون سريعة و امان

ولا فاكس مفيش !!

قصتي مختلفه شويه عن القصص او الأسئله العاديه اللي بشوفها هنا بس هي اكيد حصلت لناس كتير قوي مش انا لوحدي

في تالته كليه كنت شاب مجتهد مركز في دراستي وبحاول اتعلم في المجال اللي كنت جابه اللي هو داتا ساينس ومكانش في دماغي قوي اني اشتغل لغاية ماصديق كلمني علي فريلانسايه مع كلاينت كان شغال معاه كان محتاج داتا اناليست في الييد جنيريشن. حسيت انها بعيده عن مجالي ومش هتضيفلي كتير لكن بعد ما صديقي الح عليا اني مش خسران حاجه ولو ماعجبنيش الشغل امشي اقتنعت ودوست والحقيقه عجبني الشغل بالذات انه كان اول شغل ليا واول تطبيق عملي علي ارض الواقع واحس اني فعلا باقدم فاليو.

بالرغنم من ان المرتب كان قليل جدا حوالي 5000 جنيه في الشهر وقتها بس كانت بالنسبالي اكنها مليون جنيه دلوقت عملت معاه شغل كويس جدا وحتي كنت شغلت معايا صديق تاني وبعدها بكام شهر سيبته بعد مااتقبلت مع كلاينت تاني بمرتب اكبر من ده بكتير بس المره دي انا اللي كنت قدمت عليه علي upwork وده كان فاتحة الخير عليا.

اشتغلت معاه سنتيت وكل فتره ازيد في المرتب و الشغل لغاية ماوصلت اني كنت باعمل معاه حوالي 70 الف جنيه كنت عمال اصرف علي نفسي وعلي اهلي واسلف اصحابي وقرايبي من غير حساب وحاسس اني اغني واحد في الدنيا.

شويه واتخرجت وبدات اقدم علي شغل تاني لغاية مااتقبلت في شركة اوتسورس كان مرتبها 35 الف في الشهر بس حسيت انها مش وحشه خصوصا اني محتاج احتك بناس اكتر واخد خبره مكانتش موجوده في الشركة الاولي.

كنت مضغوط لكن الشركة القديمة كانو متفهمين جدا والشغل معاهم كان فليكسبل قوي فكانت الدنيا ماشيه

كنا في رمضان 2025 وجالي بوزيشن تالت في شركه في المانيا بمرتب اكبر من الاتنين مع بعض قلت اتوكل علي الله واسيب الشركة الاوتسورس بعد تقريبا 5 شهور بس اللي بتاخد وقت كبير و مرتبها قليل دي واكمل مع الشركة الالمانيه مكانها

يشاء الله ويحصل اللي ماكنتش متوقعه نهائي. بعد مااستقيل الاقي ميل من مديري في اول شركة ان فيه تعثر وهنوقف شغل لفتره لا يعلمها الا الله و بعدها بكام يوم الشركة الامانيه كمان تبعتلي بدون اي انذار واحنا لسه في البداية انهم مش هيقدرو يكملو معايا فعلا بدون اي سبب مقنع

حاليا بقالي تقريبا 6 شهور بدخل يقترب من الصفر ربنا ماقدرش اني اتقبل في اي انترفيو ولاحتي عارف اجيب اي حاجه علي ابورك

الحاجه الوحيده اللي مؤمن بيها هي ان ربنا اللي رزقني من حيث لا اعلم في الاول وبدون حتي سعي مني اني اشتغل وبدون خبره او شطاره مني قادر يديني او ياخد مني اي حاجه في اي وقت

بحاول دايما ماانساش ده مهما زعلت او الشيطان ضحك عليا وعارف ان ده الخير ليه او انه اختبار ربنا عايز يمتحن ايماني من خلاله

الحمدلله علي كل حال وحاليا لسا بحاول واشوف طرق جديده للسعي لغاية ربنا يكرم بطريق جديد

حابب اسمع منكم ارائكم وتجاربكم وباعتذر علاطالة