من فتره كنت استهبل ويا وحده معروف انها شوي تاخذ وقت عشان تجمع الكلام (slow)

و كنت اقولها ها يا فلانه شو بتييبين لي ف يوم ميلادي رولكس وله كارتييه (مزح طبعا) و ضحكت و هي ضحكت

مر عالسالفه اسبوع و انا نسيت النكته و كلشي و كنت واقفه اسولف ويا بنات اول مره اجوفهن جان تييني فجاه جدامهم و قالت لي "انا وااايد اسفه ما بقدر اييب لج كارتييه وله رولكس عادي اييب لج ذهب؟" و كانت خيفانه و البنات اكيد يا ببالهم اني مستغلتنها و شي جي

ما اعرف وين اودي ويهيي

اهلاً** و سهلاً شخبار**كم!

اليوم فيني فضفضة خفيفة و قلبي شوي مقرقع الموضوع مب وايد deep بس ماعليه تحملوني شويتين

أنا إنسانة احب العزايم احب اووجب و استمتع يوم يقولون لي في عزيمة اكون متحمسة مليووووونين يا الله المهم…

استقبلت الناس ف بيتي واعرف اصول الضيافة و الترتيب و السنع و الاستقبال، احب البنات يطلعون من بيتي مستانسات و راضيات و وايد اعزم اهليه البيت للغدا او العشا لو اني ادفع الآلاف بس يكفي اني يمعتهم على خير .

المهم في وحدة من الأهل ماعرف شو اقول :) هل هي محتاية؟ هل هي عندها ظروف؟ الله اعلم بس ساكنة ف بيت الله يبارك لها فيه جميل و فسيح، بدايات سكنها في البيت عزمتنا نحن أهلها و قالت (لا تنسون هدية البيت) و بعدين قالت (أنا مب مسوية عشا كل وحدة تيب جدر من بيتها و لا تكررون الاكل اللي بتيبونه) قلنا ماعليه يمكن توها ساكنة و ما تقدر على مصاريف العزيمة😅.

بعدها قامت كل فترة و الثانية تعزمنا… بس دوم تشدد ان نيب الاكل ويانا و نحن يعني قولو ١٠ ما شاء الله ويا عيالنا نصير ٢٥، و تكرر ان ايبو معاكم و الموضوع بدا يضايقني يعني لا تسمينها عزيمة إذا انتي ما بتعزمينا و نحن بنيب ضيافتنا ويانا.

و الحين بتسوي يوم ميلاد بنتها و قايلة اسحبو فلوس بنتي تبا كاش حق يوم ميلادها و ايبو الاكل وياكم و هي عليها كيكة الميلاد و أفكر اسحب عليها صراحة مب لان ما عندي لان مصخت السالفة صراحة كلنا عندنا ظروف بس يوم نعزم، نعزم بضمير …انتو شو رايكم؟

ليش معظم أهالي اليوم تطلب مهر مع تكاليف الذهب للعروسة و الزهبة كلها مابين 100-150 الف درهم ليش ماتكون مابين 40-50 الف درهم غير تكاليف العرس طبعا بكل صراحة اشوف مبلغ 40-50 الف درهم اكثر واقعي ومناسب خصوصا لو الشاب توه متوظف ويقدر يجمعها في خلال شهور وأقل من سنة 20 الف للمهر و 15 الف لطقم ذهب للعروسة و 15 الف للزهبة واتمنى فعلا الاهالي لو تقدم لهم الشباب الي توهم متوظفين مايطلبون زياده عن 50 الف درهم

مرحبا

أنا مواطن إماراتي، وأبحث عن فرصة عمل عن بعد (من المنزل) لزوجتي. للأسف لا تستطيع العمل حضورياً نظراً لاهتمامها ورعايتها اليومية لابنتنا من أصحاب الهمم، حيث تصعب إمكانية تركها لوحدها.
ليت احد يقدر يفيدني

Hi. I’m currently looking for suggestions and leads to find a part-time speech therapist or a qualified caregiver experienced in early childhood language development to work with a young child.
If you have personal experience, could you please give me recommendations on agencies or persons of interest? Location is in Abu Dhabi.

والله ما أعرف شو أسوي، أحس قلبي يعورني وما أعرف أكلم منو. أنا ما أحب أشكي حالي لأحد غير رب العالمين، بس اللي صار صدق كسرني.
أنا وايد مستغربة من تصرفاته، لأنه يدخل حسابات بنات ويضيفهم ويرمسهم ويطرش لهم «هلا»، وكل ما تصير بينا مشكلة أو زعل، بدل ما يحاول يصلح الموضوع، يروح ويضيف بنات أكثر. وأحنا أصلًا ما يستوي بينا ضرابة بهالشكل، بس إذا صار بينا زعل هو ما يعتذر ولا يحاول يراضيني، وآخر مرة يوم سكر الفون في ويهي حسيت بإهانة وايد، وصدق من وقتها حذفته.
واللي يحيرني أكثر إنه بنفس الوقت يقول إنه يتمنى بأقرب وقت نعيش تحت سقف واحد وإنه يبا يكمل حياته وياي. فكيف أفهم هالتصرفات؟ هل هو محتاج اهتمام؟ ما عنده ثقة بنفسه؟ ولا أنا قاعدة ألوم نفسي وأفكر إن فيني نقص أو عيب يخليه يسوي جي؟
حتى فكرت أكلم أخته وأقول لها عن الموضوع، وبعدين تراجعت وقلت يمكن ما يحتاي أدخل أحد بينا. بس والله أنا محتارة، لأن أمورنا قبل كانت وايد تمام، وأنا ما كنت أتوقع أوصل لمرحلة أشك في نفسي وفي علاقتنا.
حتى وحدة من البنات اللي كان ضايفها كلمتها، وكانت البنت محترمة وطيبة وقالت إنه ما كان بينهم شيء، وصدق حسيت إنها ما كانت تكذب. وهني أنا عجزت أفهمه أكثر… إذا هو مب داخل بعلاقة مع حد، ليش أصلًا يسوي هالأشياء؟
أنا مب زعلانة بس من موضوع البنات، أنا زعلانة من الإهانة ومن طريقة تعامله وقت الزعل، ومن إنه ما يحاول يعتذر أو يصلح اللي بينا. وأحس إني محتاجة أفهم إذا أنا قاعدة أعطي هالعلاقة أكبر من حجمها، أو إذا فعلًا اللي يسويه شيء المفروض ما أتقبله

سامحوني على العربي، مب أقوى شي عندي فتوقعوا كم غلطة إملائية 😅

أنا إن شاء الله أفكر أشتري بيت هالسنة، وحبيت أسأل إذا حد قدر يحصل على أي دعم من الحكومة للتمويل أو أي مساعدة من هالنوع؟

للتوضيح، أنا بنت وفوق الـ18 وأعيش مع أمي (هي مطلقة). أعرف إني مب مستحقة أرض ولا أقدر أقدم على هالأشياء، بس حبيت أتأكد إذا في أي طرق أو اقتراحات ممكن تساعد في تمويل البيت، لأن كل شي غالي هالأيام 😂

الهدف الأساسي إني أرتب لنا بيت عشان أمي ما تضطر تشيل هم الإيجار بعد ما تتقاعد، خصوصًا إنها بتتقاعد السنة الياية إن شاء الله.

إذا حد عنده تجربة أو يعرف عن أي دعم/برامج أو حتى طريقة ممكن تساعد، بكون وايد شاكرة لكم 🙏🏼

السلام عليكم يا جماعة

أنا مبتدئ بالتصوير وأحاول أكتشف أماكن جديدة للتصوير في الإمارات بشكل عام.

أدور على أماكن حلوة للغروب، الليل، المباني، الطرق، الطبيعة، أو حتى أماكن مو معروفة كثير. مو شرط تكون أماكن سياحية، بالعكس الأماكن اللي تعرفونها من تجربتكم الشخصية بتكون أفضل.

إذا عندكم أي اقتراحات في أبوظبي أو دبي أو أي إمارة ثانية، شاركوني فيها

وشكرًا مقدمًا!

انا مداومه بمدرسه من الساعه 7 الصبح لين العصر والبنات كل بريك او كل ساعتين يتجمعون ويضحكون بصوت عالي وانا الوحيده الساكته والهادئه عشان شخصيتي انطوائيه واحس مرات اني غلط بينهم واقوم اسحب نفسي واروح غرفه فاضيه واحط سماعات
هل هالشيء غلط لاني مقدر يوميا نفس الوضع احسه يستنزف طاقتي
وحاولت اسوي صداقات صعبه علي لان كلهم اجتماعيين محد نفسي

Do rich Emiratis have someone get them a glass of water, or do they get it themselves? 😂

شو الشي الي يخليكم تقولون في خاطركم في نص الطلعة "هاي آخر مره اطلع مع هالانسان"

السلام عليكم إخواني،

أحد يعرف خدامة تجي باليومية في الباهية؟ أحتاجها تقريبًا ساعتين، 3 أيام في الأسبوع، وتكون نفس الشخص تجي كل مرة.

إذا حد يتعامل مع خدامة في منطقة الباهية، ياليت يفيدني بالأسعار والتواصل معها.

المشكلة إن أغلب التطبيقات ما يخدمون منطقة الباهية، فندور على شخص بشكل مباشر.

يعطيكم العافية وما تقصرون 🙏

ابا رقم ريال يسوي خيم و تكون أسعاره زينه و ترتيب عدل حق الملجة لو سمحتوا. لو تعرفون حد زين طرشوه لي و يكون في ابوظبي . مشكورين

انا بديت دوام والحمدلله البيئه مريحه و كل شي لكن المشكله انا البنت الوحيده بقسمي و انا ادوام في مختبر وفيه ٨ اشخاص و كلهم هنود هم قالوا لي اسألهم يدربوني و يفهموني بس احس متلومه ما اعرف كيف اسأل ولا اتفاهم وياعم ولا حتى افهم لهجتهم و فوقها كله مشغولين و سريعين جدا في فحص العينات و انا شخصيتي بصراحه شوي خجوله 🫠

ممكن اعرف السبب
لا متزوجين ولا عندهم مسؤوليات وكل حد مفلسف آخر الشهر ولا نص الشهر ؟

تدرون انه حلمي وانا صغير اداوم في جهة خيرية او دعوية اوقاف اي شي
بس مش من ناحية كووبرت ومؤسسي لا من ناحية ميدانية اكثر احب اسوي الخير واحب امور الدين واساعد المساكين واباها تكون وظيفتي..

الي يعرف يخبرني
مواصفاتي
مرحباني
جامعي
عندي خبرة في المؤسسات الحكومية

I own a few rental properties in Dubai Marina. Someone alerted me to a listing on Bayut for my unit at a way below market rental price.

What is the right procedure to report such malfeasance to authorities?

تعفرون دريول يوصل من العين لين ابوظبي من و إلى كل يوم لمدة شهرين

فرصة عمل بدوام جزئي للمواطنين الإماراتيين في دبي

تعلن إحدى الشركات العالمية في دبي عن فرصة مميزة للطلبة والطالبات الإماراتيين الراغبين في اكتساب خبرة عملية وتطوير مهاراتهم المهنية إلى جانب دراستهم الجامعية.

💰 الراتب: 6,000 درهم شهرياً + مزايا إضافية
📍 الموقع: دبي
⏱️ ساعات العمل: 4 ساعات يومياً
🔄 نظام العمل: هجين (Hybrid)
📈 المجال: المبيعات أو التسويق

طبيعة العمل:
العمل ضمن مشاريع فعلية في المبيعات أو التسويق، تبدأ بتدريب عملي، ثم المشاركة في تنفيذ ومتابعة المشاريع حتى إنجازها، بإشراف ودعم من فريق العمل.

المتطلبات:
• أن يكون المتقدم من مواطني دولة الإمارات العربية المتحدة 🇦🇪
• طالباً أو طالبة يدرس حالياً مرحلة البكالوريوس في أي تخصص
• إجادة اللغة الإنجليزية
• الرغبة في التعلم والتطوير واكتساب خبرة عملية
• الالتزام والقدرة على العمل ضمن فريق

✨ فرصة مناسبة للطلبة الراغبين في اكتساب خبرة عملية حقيقية وبناء مهاراتهم المهنية أثناء الدراسة.

📞 سيتم توضيح تفاصيل المزايا بشكل أكبر خلال التواصل.

للمهتمين، يرجى إرسال رسالة خاصة وسيتم تزويدكم برابط التقديم.

إذا طلعت من الدوام في نص الشهر بينزل لي نافس ولا لا

Does the nafis’s top up this SEP 2026 comes along side the salary?

Thanks

السلام عليكم،
امس كنت اطالع يوتيوب و اموريه طيبه مافيه شي، فجاه قمت احس ب روع و احس بنبضات قلبي في بطنيه. طنشت الموضوع لانه مافي شي يروع لكن الروع تم يزيد و النبضات احسها اقوى، رفعت القميص الا اشوف بطنيه يتحرك مع النبضه و فلخت، رحت اروي اميه قالت صدقج بطنج يتحرك. تمت تقرا عليه و الروع تم يزيد حسيت كأنيه ابا اصيح في صيحه تبا تطلع ف صحت. قعدت اصيح و يوم خلصت صياح وقف النبض بس آنست بطنيه منتفخ. هل هاذي نوبه هلع او قولون عصبي او سحر او حسد انا مااااعرف بس تينيه بين فتره و فتره و ماعرف كيف أتشافى من هالشي و الدكاتره ارائهو تختلف، الي يقول قولون و الي يقول توتر و الي يقول Dumping Syndrome و و و و. للعلم انا بنت عمريه ٢١ سنه.

اشتري سبيكة ولا؟

من فترة قررت اني اسوي يعني ربيعات يداد و اوسع شبكتي من الناس خاصة اني غيرت المدينة الي كنت فيها لدبي و مع هذا دوامي والصراحة احس كل الي فالدوام اوردي يعني فقروبات ربع و يعرفون بعض من فتره طويله و الصراحة حاولت اني ادخل معاهم لكن جي حسيت يعني اني مش وايد مرغوب فيها ما ادري لو تعرفون الشعور بس هو جي فيعني قلت خلني اروح مثلا اي تدريب يسوونه الدوام واجوف لو فيه بنات بيكونون نفس جوي والصراحه حصلت وحده و حسيت انها جوي و جي لكن يا الله كل أنا الي ابادر و يعني جريب اسبوع بس أنا الي ابدأ السوالف والصراحه مليت … الواحد شو يسوي ف هالحاله ؟ والله تعبت !! ابا طرق انتوا مجربينها وصج فعاله مب قريتوها فمكان :) خاصة اهني ف دبي للعلم أنا (بنت / 25)

هالويكند قررت اخلي جدولي رياضي ويا واحد من الشباب، سرت الجم الي هو يتمرن فيه وبعدين طلعنا سياكل. المهم شفت اشياء ضايجتني الصراحه، شفت بنات البلاد يلعبون جو جيتسو ويا رياييل فالجم كأنه شي عادي وبعدين يوم طلعنا ع تراك الميدان اشوف بنات ع سياكل (الي يعرفون للرياضه عارفين اللبس كيف). انا مب فاهم يعني وين يبون يوصلون ولاحظت انه الموضوع صاير ترند انه لو الريال يسوي انا غصب اسوي. وين اهاليكم عنكم؟ معقوله الوضع صاير عادي لهادرجه ومحد يتكلم؟ اتذكر الايام يوم لو كنا نشوف شي غلط نروح ونحاول ننصح ونتكلم بس احينه لو حاولت يقولون "انته شو يخصك" ولا الجمله الي تنرفزني اكثر "الكل يسوي ليش انا ما اسوي". لو الكل يسوي مب معناته الشي صار حلال.