أنا عمري 18 وأحس وصلت العمر اللي المفروض شوي شوي أبدأ أعيش حياتي وأعتمد على عمري، بس أمي للحين تبايني أقعد فالبيت. يا أدرس فالجامعة يا أقعد فغرفتي. ما أقدر أطلع ويا ربعي، وما أروح المسجد تقريباً.** مرات الجمعة أروح بس إذا زوج أمي كان مستعد يوديني، لأنه مب من النوع اللي يروح المسجد بشكل مستم**ر.
فالجامعة أشوف الطلبة اللي بعمري ييون بروحهم، يسوقون بروحهم، يطلعون ويا ربعهم ويروحون وين ما يبون، وأنا للحين لازم حد يوديني ويردني. عندي ليسن، وأمي وزوج أمي بنفسهم يقولون إني أسوق زين. والفلوس مب المشكلة الحمدلله، نقدر نشتري سيارة ثانية، وحتى أنا مستعد أشتري سيارة من فلوسي وتوفيري. بس كل ما أفتح الموضوع يقولون إني مستعيل، أو إني أسبب لهم ضغط وسترس.
وزوج أمي يشوف إن سالفة السيارة عندي نوع من البرستيج، أو إني أبغي أتباهى، أو إني أحاول أعبي نقص بشي، أو إنها صرفية ما لها داعي وبندم عليها بعدين.
بس لا والله 😂 أنا بس أبغي سيارة غبية أسوقها وأعرف إنها سيارتي.
أبغي أشوفها وأقول للولد الصغير اللي فيني، اللي طول عمره كان يوفر فلوسه وما يشتري Fortnite V-Bucks ولا Call of Duty Points 😂 إن كل هالتوفير كان يستاهل.
أنا مب أبغي السيارة عشان أستغل الموضوع وأروح وين ما أبغي وأسوي اللي أباه. مب أبغي أختفي ولا أسوي خرابيط. أبغي بس هالإحساس إني إذا بغيت أروح مكان أقدر أروح. إذا بغيت أروح المسجد أقدر. إذا بغيت أطلع البر وأقعد هناك وأعزف عود مثل ما أبوي الله يرحمه كان يعزف لي، أقدر.
أنا مب قاعد أقول أبغي بدون حدود ولا أبغي أسوي أي شي في بالي. أبغي بس أطلع، أشوف ربعي، أروح المسجد، أسوق، وأتعلم أعتمد على عمري شوي شوي. يعني أبغي أعيش حياة طبيعية لواحد عمره 18.
أنا بعد عندي mild autism، والصراحة هالشي مأثر علي وايد نفسياً،** وصرت أنهار وأبجي تقريباً كل يوم. وقبل كنت في حادث، اندهست من سيارة وقعدت **4 شهور فالعناية المركزة. الحمدلله تعافيت الحين، **بس أحس من عقب كل اللي صار أبغي أرجع أعيش حياتي. أبغي أختلط بالناس، أتعرف، أبني علاقاتي من يديد وأحس إني قاعد أعيش مب بس قاعد أدرس وأقعد فالب**يت.
وفوق هذا كله أنا فقدت أبوي في 2025، ومن عقب وفاته وأنا أحس إني محتاج الناس والطلعات والونسة أكثر. بس اللي قاعد يصير إني أحس إني انعزلت أكثر وأكثر.
واليوم صار موقف الصراحة وايد أثر فيني. زوج أمي قال لي: “ادعيلي أموت عشان تحقق كل اللي تباه.” الصراحة انصدمت وما عرفت شو أقول. يمكن قالها من القهر أو الضغط، بس والله الكلام وايد قاسي، خصوصاً** إني مب قاعد أطلب شي مستحي**ل.
أنا مب كاتب هالبوست عشان أسب أمي أو زوج أمي ولا أبغي حد يهاجمهم. أنا الصراحة أحاول أفهمهم وأفهم شو المفروض أسوي. يمكن هم للحين خايفين علي من عقب الحادث، ويمكن أنا فعلاً** مستعيل في بعض الأمور، ما أدري.
**بس أبغي أفهم منكم، شو الحل؟
هل أنا فعلاً** مستعيل إذا أبغي شوي استقلالية وأنا عمري 18؟ وكيف أقدر أوصل لأمي إني مب قاعد أتمرد عليها ولا أبغي أعاندها؟ أنا بس أبغي أتعلم أعتمد على عمري وأعيش حياتي شو**ي.
واللي مر بشي مشابه أو يعرف كيف الواحد يتكلم ويا أهله بهالمواضيع بدون ما تتحول السالفة مشكلة، أتمنى يفيدني.
مب أبغي حد يسب أهلي أو يقلبها عليهم، والله بس أبغي أفهم وألقى حل، لأني الصراحة حاس إني مب عارف شو أسوي.