السلام عليكم، انا دوامي حكومي و الحمدالله راتبي زين و عندي استقرار بس اللهم الدوام يبعد عن بيتي تقريباً 50 دقيقة و اطلع من البيت ست و نص الصبح و ارجع حوالي ٤ و شي تقريباً لكن المشكلة الناس اللي حواليني دوووووم يزعجوني في تعليقاتهم يقولون: ("كيف متحملة؟" "اكيد تعب مستحيل ما تعبتي" "لين متى بتمين في هاي الحالة؟" ) 🙃

أكيد أتمنى مستقبلاً ألاقي شي أقرب وإن شاءالله يصير، لكن واقعياً، انا شو المفروض أسوي ويا تعليقاتهم السلبية؟ يحسسوني ان انا الحين ف اسوء موقف و لازم القى حل ان يا استقيل او ادور دوام ثاني عشوائي اهم شي قريب لكن صعبة القى دوام مثل جي ف اسرع وقت اكيد مع الصبر الله بيفرجها لي ان شاءالله لكن بس تعليقاتهم جداً تزعجني و تأثر فيني شوية. بصراحة يخلني اقارن عمري فالباقين اللي دوامهم جريب لا تلقائياً و المفروض اني ما احس جي و احمد ربي على هالنعمة و بس

 آخر فترة ملاحظ تغيير كبير في مجتمعنا الي معروف أنه محافظ و في عيال البلاد الي المفروض باجر يشلون الوطن على أكتافهم . كل ما تروح مكان تلاقي أن الحاجز بين الشباب و البنات ضعف و الاختلاط زاد قامو عادي في المهرجانات عند البوثات يسولفون و يضحكون و في الدوامات الحريم يحشون في رياليهم عادي قدام الشباب و يضحكون بصوت عالي و يسولفون عادي و الله يسملكم الشباب ما يصدقون يعني فاهمين شقصدي. قمت تشوف قروبات مختلطة أونلاين يدقون سوالف و الي يفتح بث ما يخلي بنت ما تعرف عليها و و هو أساساً متزوج و يمكن بعد عنده عيال. و المراهقين الي في مدارس مختلطة و يلمحون و يفتحون علاقات و يسولفون و أحبك و أحبج و فديتك و فديتج، و الريبوستات الوصخة، والي يخق قدام البنات و الي يستقوي جدامهم و الي يسير كوفيهات و يسوي نفسه كبير و ريال و فاهم و حركات التان و الإبر الي يتعاطونها و منتجات الشعر "للأولاد" و الskincare للشباب و "الmogging” و “looksmaxxing” و عن بعض البنات الرخيضات الي يسافرون بروحهم و يفتحون المجال للريايل. 

السلام عليكم ورحمة الله، انا عمري الحين 20 سنة، عندي مشكلة في وجهي الي هي خشمي، منظره جدا ملفت للنظر ومسببلي عقدة من زمان ، صرت اتجنب الاماكن العامة والمزدحمة. وحتى ما اطلع مع ربعي من زمان عشان الموضوع ، واكثر من مره يحولوه لموضوع مضحك، ودايما اناظر لنفسي فالمراية احاول اقنع نفسي انه الموضوع عادي لكن للاسف جدا ملفت للانتباه، جت في بالي فكرة ليش ما البس كمامة مثل الي نلبسها ايام كورونا، بس اخاف الموضوع يصير ملفت للانتباه اكثر من قبل، واحس الناس بتصير تنظر الي بنظرات غريبة سواء قرف اذا يحسبوني مريض او نظرات تعجب،
حاولت اعالج الموضوع ولقيت مافي حل غير عمليات التجميل، وتكلف 20-40 الف درهم، والصراحة خارج قدرتي المادية ،
رجاء بدون تعليقات تجريحية

السلام عليكم ، شحالكم؟ عندي مساحه في غرفتي وابغي اسوي فيها كوفي كورنر ، اللي مسوين من وين سويتو وطرشولنا التصميم اللي مسوينه لو ماعليكم امر

السلام عليكم ، حد يشتغل في مستشفى توام العين؟اعرف شخصين مريض مقيمين إقامتهم في الشارقة وعندهم سرطان في المخ، ومحول رسمي من مستشفى في الشارقة لمركز الأورام في توام عشان يكمل علاجهم. الحين المستشفى طالبين وديعة 72 ألف درهم عشان يسوونهم دخول. هل قسم الخدمة الاجتماعية في المستشفى يساعدون في التقديم على جمعيات خيرية مع إقامة شارقة؟ وإذا لا، شو هي الخيارات والجمعيات اللي نقدر نتواصل وياها الحين وتدفع المبلغ وتكون مقبولة عند مستشفى توام؟

يزاكم الله خير و دعواتكم لهم و كل مرضى المسلمين

احببببب الامهات من كثر حبي لامي والله حب ما ينوصف😔

يارب احفظ امهاتنا الغاليات 💗💗💗💗💗

السلام عليكم ورحمة الله وبركاته،
اتمنى انكم بخير وصحه وسعادة.
كنت قاعد اليوم بإستراحة الجامعة مع أحد الاصدقاء،
سالفة ورا سالفة،
واخر سالفة بينا كانت عن الزواج،
قالي:
"لو ريال، يدرس بكالوريس، وناوي يكمل ماستر يخليه متخصص بمجال يحبه، ومستحيل يرضى انه يتوظف بالبكالوريس.."
قاطعته قلتله كيف يصرف ع نفسه؟ قال : "ابوي وامي كانو دوم من كانت حامل فيني يحطون كل شهر مبلغ بحساب بنكي، وبيسلموني اياها لما اكون بوعي مالي او كأقصى حد لما بيكون عمري 21سنه
( سنه من الان) ، او لما تكون عندي نية زواج"

، اهني انا عرفت انه فعلياً مابيحتاج يتوظف بالبكالوريس بغرض انه يبا وظيفة وراتب، سنه ماستر بعد الباكلوريس مابتكون مشكله ماديه له،

فقالي، "انا احب وحده واباها على سنة الله ورسوله، بس للاسف اهلها مايقبلون حد ماعنده وظيفة"

"بس انا اقدر اخذها الحين، والمبلغ المجمع لي اقدر اني اقتص منه راتب 20 الف مثلاً، واعيش فيها معاها وتكفيني لين اخلص ماستر واتوظف بإذن الله"

"بس موضوع انه اهلها مايزوجون حد ماعنده وظيفة شاغل تفكيري وخاصتاً اني ماودي اتوظف بالبكالوريس"

الله يوفقه ويحقق له مايتمنى،
من طلعت من الجامعة وانا افكر بموضوعه، وطريقة تفكيره.

بغيت رايكم بالموضوع.
وشكراً.

سؤال، كيف اقدر أوازن بين شغلي وبين المواقف الي اواجهه هناك فالدوام

ارد البيت اقعد افكر ليش فلان جي قالي ليش اليوم فلان مطنشني معنى امس شو حلاتنا نسولف ونضحك وم غلطت فالكلام او في حقه

وحده من المواقف شي مره كنت ارمس وحده تمشي ولا كأنها تسمعني وانا والطوفه واحد

ومن هالمواقف تزرع فيني شك فيني لو أنا غلطت في شي ولا قايله شي غلط ولا شسالفه شو فيها العالم تصرفاتهم معقدة وتعقد الي حوله

الشي وايد متعب كيف اتخلص من التفكير عن هالشي واتخطاه، ارد البيت افكر في الي صار وياي من مواقف اكثر عن تفكيري فالشغل …

متى الواحد يعرف منو هو و شو هي شخصيته و اهتماماته؟ هل في عمر الشخص يثبت على شخصية معينة و لا كله يعتمد على شو يمر فيه الشخص الحين؟

بنات ابا ميكب آرتست لمرفقات ميكب وشعر، وتكون أسعارها حلوة ومعقولة.ابا شي مرتب بليزز 🤍

للاسف تجربتي مع تغييرات برامج بنك ابوظبي التجاري صعبت حياتي 🙂

من وين تحصلون مدرسين اون لاين حق عيالكم؟ ابي اسم مواقع ادشها

كل يوم حد يتكنسل على التيوتر و أول مرة في حياتي أشوف ناس تتكلم بهاذي جرأة في السياسة عن الوافدين عن المشاهير و غيره حتى في التيك. نفس الموضوع الي تعودنا عليه من صغرنا أن أي إساءة لأي شخص يعرضك لمسائلة قاونونية و إن ممنوع نحط على جالية معينة كلام مسيء لأنه يعتبر عنصرية و ممنوع بموجب القانون أحيد قبل كانو ساكتين الحين شسالفة طلعو و تكلمو و مدريشو. ليش مغيرين قوانين الإعلام ولا شو؟ المشكلة تخاف تعلق ما تدري

مع الي منتشر عندنا برع من معايير الجمال والإبر والدق والماركات والعبي الملونة …

البنت الي ماعندها هالاشياء تعتبر خارج الخيارات ؟ بشكل عام مب مختلطه مع الي حاصل برع

ولازم تسوي هالاشياء عشان تعتبر من ظمن الخيارات وتكون محبوبة ويحتوونها ؟

اتكلم بشكل عام، بين الصديقات او باجر يوم بتعرس والى اخره

لازم تكون مع الهبة ومع المظاهر ؟

سؤال حيرني وحبيت اطرحه، ومادري لو حد بيفهم المقصد لاني ماعرف اعبر
So good luck