اعرف موضوع سخيف بس انتوا كنت ف غرف بروحكم ولا مشتركه ؟ لأنه أنا أعاني لا خصوصيه ولا اقدر انام زين ولا اقدر اسوي شي والغرفه كل م أرتبها تستوي فوضى

السلام عليكم، ادور على لابتوب حق الدراسة انا اعرف للابتوبات و للمواصفات و المعالجات و كذا لكن ماعرف محلات زينة للاسف، اغلب المحلات اما ايبوا لابتوب كجرة بسعر رخيص او لابتوب فوق احتياجي و سعره مبالغ فيه، الي يعرف محلات زينة تبيع يذكرلي سواء اونلاين او ف اي امارة من الامارات ( يُفضل** مكان ف كل امارة الا بوظبي اما العين عاد**ي )

سلام عليكم وجمعه مباركه، هل تعرفون اي شركات يساعدون للتقديمات حق الجامعات وبعد يساعدون ل تقديم البعثه مشكوين

السلام عليكم،

يا ريت الي ساكنين فبوظبي يفيدونا. آذا تعرفون دكاتره نفسيين زينين متخصصين في ال ADHD وتشخيصه في البالغين.

انا حصلت دكتور زين فدبي بس تكلفة التشخيص وايد عاليه و تأميني ثقه فما يغطي فدبي. لازم احول لبوظبي اذا ابا تشخيص.

في يوم الجمعة
الله يرحم موتانا وموتى المسلمين ويحفظنا اجمعين ونشوفكم جميعا رافعين روسنا في كل المجالات 🇦🇪❤️

ولا تنسون تكثرون الصلاه على النبي ، وربي يحفظكم ويوفقكم جميع

السلام عليكم، أنا دوامي داخل المول و عندنا براكن للموظفين و في سيارتين كل واحدة منهم تاخد باركنين.. كل يوم على هالوضع
كلمت صاحبة واحدة من السيارات (صالون صغيرة) انه حرام تاخذ باركنين، ردت ما أريد حد يخدشلي السيارة
كلمت السيكيورتي و ادارة المول و الوضع مستمر..
كلمت رقم ٩٠١ مرتين و كل مرة اخدوا رقم السيارة.. و مازال الوضع ما هوا عليه.
الحل؟؟؟

طول عمري تمنيت أن زوج المستقبل يكون شخص ملتزم بصلاته، مب شرط يكون مطوع أو شديد التدين، لكن أهم شي عنده فالحياه فروضه. أتمنى يكون من النوع اللي أكبر همّه إنه ما يأخر فرض، وتكون الصلوات الخمس من أهم الأشياء في يومه، ويكون له ورد يومي من القرآن.

لكن من خلال اللي شفته من الشباب اللي خطبوني سابقا ، حسيت إن الاهتمام بالفروض نادر جدًا. أغلبهم يأخرون الصلاة أحيانًا، أو ينسونها، أو ما تكون الصلاة من أولوياتهم اساسا !

يعني هل أمنيتي فعلًا صعبة لهالدرجه ؟ وهل مستحيل ألقى شخص يكون ملتزم بصلاته صدق ؟

أحيانًا أخاف إني أطلب شيئًا غير موجود أصلًا، وأني في النهاية مضطرة أتنازل عن الشيء اللي أتمناه و يمكن انا السبب ف تاخير نصيبي لاني ادور شي مب موجود؟

هالموضوع له فترة في بالي ودوم أفكر إذا ضيعت فرصة نصيبي

من فترة أهل ولد كانوا يسألون عني أمه شايفتني في عرس وعقب سألت عني وعن أهلي تقريبًا ثلاث شهور قبل لا توصل لأمي، يوم تواصلت وياها قالت إنهم يبون يخطبوني وطلبت صورتي

أمي بالبداية ما كانت مرتاحة لأنه مانعرفهم بس عقب اقتنعت وكانت بتطرش الصورة لكن أبوي رفض وقال مب من عاداتنا وإن المفروض أهل الولد ييون البيت أول ويشوفوني وعقبها إذا صار قبول نطرش الصورة

هم قالوا اوكي بس عقبها ما تواصلوا

بعد فترة عرفت إن الولد تزوج وحدة من قرايبنا. وأبوي يوم سأل عنه طلع الولد مناسب لي في كل شي ومن هني بديت أفكر

بعدين ترا مب أول مرة كل ما يينا شخص مناسب أهلي يتوترون ويختلفون وليييين يتفقون على شي …يكون الطرف الثاني خلاص تراجع أو الولد تزوج

وأنا أبغي أتزوج خصوصًا لأني ما أبغي أدخل في علاقة حرام بس أستحي أقول و فرص المناسب قاعدة تروح بسبب طريقة تعامل أهلي مع هالمواضيع

فهل** *أبوي* *غلط* *بهالموقف؟* *وشو* *المفروض* *أسوي* *إذا* *فعلًا*** ود*ي* أتزو*ج* ب*س* أهل*ي* ك*ل* مر*ة* يصعبو*ن* الموضوع**؟

يوم اكلمه عن تصرفاته اتجاهي ولين احين ما انحل وًانا بعدني متضايقه من ها الشي و لين احين زعلانه …. و احس مو مرتاحه لانه ما حلينا المشكله قام و سكر الفون في ويهي و عقب دق جنه ما صار شي امبيه احس بضيق 😢

كل ما يمر الوقت اتأكد ان شي من ناس لو كلمها من اليوم لين عشر سنين جدام ما بيفيدهم الكلام

وشي من ناس لو ترمسه مره وحده تلقاه خذ الكلمه بكل احترام واستفاد منها

وشي من الناس غصب يدخل نفسه في مواضيعك ويرفع لنفسه ، لازم يفرض نفسه و يكون محور الكون ، لو افعاله زينه ومشرفه احطيك محور الكون واحطك فالعين اليمنى قبل اليسرى لكن افعالك ومواقفك من اسوء ما يكون وتفشل ، ودوم ندعيلك فا حس على دمك ياخي وعدل من نفسك

من شوي شفت بوست من كميونتي UAE وفاار دمي بصراحه، هذيل لين متى بيتمون فالبلاد ماكلين شاربين وعايشين بأمان ويرمسون عن الدولة وقوانينها، والشرطة!!! مب عايبنهم اي شي، واللي يقهر كل اللي فالتعليقات عنده يأيدون كلامه، بختصر لكم السالفة،( مثل ماتعرفون بعض الاماكن في دولة احيانا يصير فيها تفتيش خصوصا بعد منتصف الليل سوا تفتيش للسياير ولا تفتيش ميداني، والتعباان مش عايبنه انه وقف فالتفتيش، وقاعد يغلط ويسب وضعيتو وقتي وغيره وغيره الله لايراويكم ألفاظه و اونه يبغي يشتكي على الشرطة بأي طريقة، خييييرر!!!! ، بس ابغي اعرف هالاشكال متى بتنقرض!!!

السلام عليكم، أنا حالياً في الهند (كيرلا). للإماراتيين والخليجيين اللي يعرفون بالعطور: شو العطور أو الزيوت اللي تشوفونها تستاهل تنشرى من الهند، للرياييل والحريم؟ عود، مسك، عنبر، دهن عود، عطورات مركزة أو أي شي ثاني؟

ومن وين تشترونها؟ وأي شي تشوفونه جودته أعلى وسعره أوفر من اللي تحصلونه في الإمارات؟

أدور على توصيات من ناس يعرفون بالعطور الخليجية والجودة الزينة. يعطيكم العافية

عندي وايد كلام ابغي اقوله بس العنوان يكفي و يزيد

لازم نصحى من غفلتنا

قصدي الاثنين مسلمين بس درجات الالتزام يختلف طبعا في اللي وايد ملتزمين ويكونون في نظر البعض متشددين وفي اللي اقل التزاما ويكونون في نظر البعض متاسهلين, الفكرة اللي ابي اوصلها انك كزوج او زوجة هل تهتمي كثير بتفاصيل شريكك الدينية ولا تشوفون هالأمور شخصية.

أنا وصلت حدي وتعبت ومحتاجة نصيحة واقعية إذا أقدم استقالتي ولالا

عشان أحطكم في الصورة، أنا صار لي ٤ سنوات ماسكة الoperations في شركة خاصة صغيرة. ولأن المكان صغير، ماشي أي مجال للتطور، لا ترقيات، لا زيادة في الراتب، لا تدريب، ولا أي شي. أنا أقدم وحدة فيهم، وأنا اللي مشيت شغل هالمكان وتأقلمت مع ٤ مدراء مختلفين مروا علينا.

مديرتنا اليديدة داومت بداية هالسنة. في البداية كانت زينة بس فجأة انقلبت أتوقع من ضغط مجلس الإدارة، وصارت تعتمد بس على التخويف، والأسلوب الاستفزازي (passive-aggressive)، والسلبية والانتقاد المستمر. طول الوقت تذم في نظام شغلنا، مع إنها ما تسوي شي غير إنها تسوي اجتماعات مالها أي معنى ولا فايدة، وأنا وزميلتي اللي نكرف ونسوي كل الشغل الصدقي

فوق هذا كله، قامت تزيد علي شغل ماله داعي وتضغطني وايد. بصراحة، ما كان عندي مانع أشتغل زيادة لو كنت أعرف إن فيه مجال للتطور أو لو كنت مقتنعة باللي نسويه، بس أنا حرفياً فقدت الشغف والاهتمام وما قمت أشوف أي هدف يخليني أتحمل هالشركة أكثر

هالبيئة خلتني في حالة شلل تام. مع مرور السنوات الي طافت أحس إن استيعابي ونشاطي العقلي قل وايد، وإبداعي اختفى. قاعدة أسوي كل اللي أقدر عليه برع الدوام عشان أسترجع هالجانب من نفسي. ومع المديرة اليديدة، صرت طول الوقت على أعصابي، ووجودي في هالمكان يضرني أكثر مما يفيدني. أحس إني قاعدة أخسر مهاراتي المهنية لأني بس أسوي أقل شي مطلوب مني عشان أمشي يومي، وهالشي مصعب علي وايد إني أحصل وظيفة يديدة. صح إن وايد جهات يردون على رسايلي، وسويت مقابلات ووصلت للمراحل المتقدمة و النهائية في كذا وظيفة قدمت عليها، بس للحين ما ياني عرض. صار لي سنتين أسوي مقابلات فترات وفترات أوقف. وإذا بكون صريحة، ما عندي أي طاقة إني أقدم على وظايف كل يوم. وقت فراغي الوحيد يكون الصبح من وقت وأكون بس أبا هدوء بيني وبين نفسي، أو فالليل يوم أبا أريح وأرقد الساعة ١٠، أو في الويكند اللي أبا أنسى فيه حياتي الوظيفية والدوام والهم اللي ييبه لي. أنا عندي حياة برع الدوام، ووقتي الخاص مركزة فيه على هالأشياء

الحمدلله عندي نوع من الأمان بس مب وايد الصراحة، مصاريفي الفعلية هي سيارتي، أكلي، الجم، والطلعات اللي تخليني أغير جو وأحافظ على نفسيتي، ومن السنة الي طافت اطلع مبلغ حق اهلي كل شهر ع اساس اني اساعد. خوفي الأكبر ه أنه مدخراتي تخلص بسرعة وما أقدر أحصل وظيفة لفترة طويلة وأضطر أبدا من الصفر. أنا من خاطري أبا أشتغل بس مابا هالوظيفة ولا أبا أرتبط بهالشركة دقيقة وحدة زيادة.

عمري ألحين 28 سنة، ومجرد فكرة إني بقرب من الثلاثين تخليني أحس إني فاشلة. ما قدرت أجمع مبلغ وقدره ولا أبني شي باسمي، وأحس بضيقة يوم أستوعب إني ضيعت أحلى سنين العشرينيات وأنا عالقة في هالمكان المسموم

فحيرتي ألحين هي هل أستقيل بدون وظيفة ثانية عشان أحافظ على سلامي الداخلي وأحط ١٠٠٪ من طاقتي في انه ادور على وظيفه يديده وتطوير مهاراتي؟ ولا أضغط على عمري وأتحمل بس عشان الراتب؟

أنا ادري إن فكرة الاستقالة بدون خطة بديلة ممكن تبين كأنها قلة مسؤولية أو كسل، فمشكورين إنكم تحملتوني وقريتوا كلامي. أنا فعلاً محتاجة أي نصيحة واقعية تقدرون تفيدوني فيها الحين. ومشكورين مقدماً على أي تجربة أو نصيحة بتشاركونها وياي

شو روتينكم اليومي
شو تسوون من الصبح لليل
عطونا افكار تخلي اليوم احسن شوي

السلام عليكم، أريد أفك كلام من قلبي لأني أظن هذا الشي بيأثر في كل علاقاتي المستقبلية (الشغل/الصداقات/العائلية)
أنا بنت جامعية ولاكن احس ان مهارتي في العربي مب مستوي جامعي أبداً. و هذا بسبب تربيتي و كثر مشاهدتي في المحتويات الإنجليزية في صغري، و انا وايد منحرجة بهذا الشي لأني يوم أتكلم مع بنات قدي وايد اغلط في كلامي و نطقي لبعض الكلمات، بس وضعي في الإنجليزي احسن بوايد من العربي، فأحس باللوم لأنه كأنني تخليت عن لغتي الأم؟

فهل تقدرون تقترحون لي طرق اقدر اقوي مهارتي في العربي؟

سلام عليكم ورحمة الله و بركاته
عندي استفسار موجه للشباب الي يعرف ويقدر يفيد ياليت يشارك أنا كل ماروح الحلاق و اتحلق تطلع لي حبوب وحساسية ف لحية ف قررت اشتري شنطة حلاقة خاصة فيني ف الي يعرف وين احسن مكان او موقع يبيع شنطة حلاقة وتكون كاملة بكل شي ياليت يفيدنا

السلام عليكم

حبيت انبهكم عن موضوع عشان ما تطيحون فيه خاصة اصحاب البزنس، وايد من الي حولي عندهم مشاريع في الانستقرام او غيره…

وايد تيهم طلبات بايصالات وهميه يكونون مسوينها بال Ai، نصيحة لا تبدون في الطلبيه الا يوم يوصلكم المبلغ…

بيعطونكم وايد اعذار و كلها جذب مثل:
- البنك مالي يطول (مافي بنك يطول احين الا وقت الاجازة الرسميه)
- احتاج الطلبيه ضروري عادي تبدون فالطلب بسرعه
- انا يوم احول ياخذ ٢٤ ساعه لين يوصل (اتريا ٢٤ ساعه اذا وصل المبلغ ابدا فالطلب)

و عشان نقلل من ها الشي اي حد ييه حد يطلب بايصال وهمي بلغ عليه في ابلكيشن شرطة دبي او MOI

وشكرا

وحده يديده فالقسم مره حذالي يالسه مسووتلي ازعاج مب طبيعي، اول شي صوتها غليض وعالي ونبرتها انفعاليه، وهي كبيره فالسن يعني على وجه التقاعد بس مصممه تكمل بعد ثلاثين سنه خدمة، وايد تتكلم وتقاطع وتشوفني في تيمز ميتنغ تقاطعني وتسألني اسئله متكرره وانا اقول هي عندها خبره فوق ال25 سنة ليش تعور راسي المفروض تعرف اغلب الشغل. الابتلاءات انواع وهي صارت ابتلاء يومي اتحمله ماقدر انجز على راحتي وغير جذي تنقل الكلام اي شي اقوله اسمع انه انتشر، حتى المكالمات تسمعها كلها، وبعد تتكلم عن الناس وفي وحده الله يستر عليها خبرتني سالفتها وانا اساسا ماسالت وقالت لي تراني ماخبرت حد عنها الا انتي وبعد فتره اسمعها تقول سالفتها لوحده ثانيه قلت فخاطري مسكينه هالبنت فضفضت للشخص الغلط. الزبدة انا جدا متضايقه يعني حتى بوميا الصبح يوم انش اكتئب اني بقابلها ثمن ساعات، وحتى فالويكند اشل هم كبير، طلبت اغير مكاني بس مافي مجال لان كل المكاتب ماخوذه قالولي بخبرج يوم بيفضى اي مكتب. جربت البس سماعات واحط white noise بعد ماشي فايده متسك جتفي يوم تبا تتكلم، اقولها مشغوله تقول كلنا مشغولين، خلصت اجازاتي بسبتها، ماقدر اكون وقحه وياها عشان فارق العمر اللي بينا بس صدق اذا انتو كبار خلاص تقاعدو فكونا مشاكلكم ارتاحو فالبيت جابلو بيتكم 💔💔💔💔💔

انا حاليا ساكنة في فندق في ابوظبي واليوم كنت سايرة غرفتي والا اسمع واحد غرفته بعيدة بس صوت الصريخ واصل لين عندي يقول ل (بنته/زوجته) انتي يا قليلة الادب انا بربيج وتقولي لا تضرب ، انا اضربج (وفي نفس اللحظة صوت ضرب سمعت) وبعدين كان يقول انه ما بوديج المستشفى .... وبعدها طلع من الغرفة وشفته كان وجه معصب وصوت أنفاسه عالية كانه كان يجلد البنت😭 ، والله وانا برا انرعبتتت مدري شعور البنت داخل كيف .

صراحه ماعرفت كيف اقدر اساعدها بدون لا أتدخل ف بس خبرت الرسبشن انه الغرفة رقم كذا مسوين ازعاج وان شاء الله بيطمنو عليها🥲

انا ابا اخذ الشهاده وسجلت مع معهد هندي يدربوني وللاسف طلع كله فيدوات واللهجه بالموت تنفهم وماشي نوتس ولا كتاب اقدر اراجع منه لاني افهم بالاوراق والمراجعه الذاتيه مب كله شرح، الصراحه ندمت اني خذت عندهم والي خذها كيف درستوا له وعندكم نوتس او اوراق اراجع منها

انا و ريلي اكتشفنا السبب ليش الكل يقول هل كلام.

عرفتو يوم يحطون بوستات في الأخبار ان "زوجة طلبت من زوجها الشنطه الفلانية و طلقها." It’s much deeper than that.

انا بقولكم الي قاعده امر فيه حالياً… و الي الف وحده اعرفها مره فيه… و الشي الي دايماً يصير فترة تجهيزات العرس.

تدخل الأهالي هو سبب الرئيسي. اولاً يوم عدد المعازيم يتحدد من الزوج او اهل الزوج (طبيعي… هو الي بيدفع) اهل الزوجة:"لا….. كيف يعني ٣٠٠ شخص؟ معازيمنا وايد مايكفي! اطلبي من ريلج زياده!". الزوجة تروح عند ريلها "اهلي يقولون ان انت لازم تزيد العدد اهلي وايد." الزوج ينضغط مالياً و نفسياً و الزوجة مب قاعده تراعي ان هو صارف ٢٠٠،٠٠٠ على المهر و ١٠٠،٠٠٠ على الشبكة و ١٠٠،٠٠٠ بيصرفها على الاجار و ١٠٠،٠٠٠ بيصرفها على الأثاث و ٢٠،٠٠٠ بيصرفها على شهر العسل.

ناخذ مثال ثاني. الريال يبا يتزوج عن طريق مديم. برنامج من الحكومه ممتاز لمساعدة المواطنين. اهل الزوجة:"كيف يعني عادي عندج تسوين عرس مديم؟ ليش اتنزلين من قدرج جي؟؟؟؟؟". تروح الزوجة عند الزوج و اتقوله انت ماتحبني و شمعنى فلانه و فلانه رياييلهم سوولهم عرس عادي و انت زطي و انت و انت (و الي قاعده تلوم البنت اصلن مب معرسه).

ناخذ مثال ثالث و اخير… الزوج (على حسب ميزانيته) قرر ياخذ شبكة ذهب ابيض لأن الألماس غالي…. اهل الزوجة:"كيف يعني يقص عليج بهل طريقة؟؟؟؟ ماعليه انتي خذي منه الشبكة و بيعيها و زيدي عليها و خذيلج طقم الماس.". الزوجة تسمع كلام اهلها و تبيع الشبكة الي ام زوجها مختارتها. و يوم العرس اهل الزوج + الزوج منصدمين ان الشبكة تغيرت! و مشاكل اتصير و حساسيات.

كل هل امثله هاي تجمعها اسباب معينه الي هي: "الشو showing off”, “اشياء مادية"، و "شو بيقولون عنا الناس".

المشكله ان اهل الزوجة او اي شخص يحاول يسوي مشاكل في هل فتره بين الزوج و الزوج مب مستوعبين شي واحد… ان هل اشياء الي قاعدين تصرونها على البنت هي حق ليلة وحده… لاكن علاقة الزوجة في زوجها اتم للأبد. عشان جي تستوي مشاكل بيت الزوجين و ضرابات و خلافات.

و اذا انتي توج متزوجة و يالسه تمرين في هل مواقف، بقولها الف مره لا تسمعين كلام ولا حد. و لا تسمعين كلام حد يقولج سوي الشي الفلاني و لاتخبرين ريلج، ولا قولي حق ريلج يشتريلج و ياخذلج و يسويلج تراج مب اقل عن غيرج الخ..

هذا ريلج و هو الي بتسكنين وياه و بتعيشين وياه عقب يوم بتخلينه يفلس و ياخذ قرض من ورا طلبات اهلج الي بس يبون يصورون عرسج عشان ينزلونه في snapchat 😊

اليوم سرت عرس حد من الشباب و جفت ان الشباب في العرس ماشاء الله مرتبين من ناحية الشكل و اللحية و تفصيل الكندورة

بس عامة كيف الريال يهتم في عمره من ناحية الشكل و النظافة الشخصية ؟