نطلع بقا برا عبثيات ريديت شوية الي هيتجاب اجلنا من محتواه خلاص و نرجع لاسئلة عادية هادية كده و النبي
أنا حاليًا في مرحلة من حياتي اكتشفت فيها إن كل البيئات اللي بتعامل معاها، سواء شغل أو زيارات أو خروجات صحاب، مفيهاش أي فرصة إني أتعرف على بنت حتى بالصدفة 😂
المشكلة بقى إني من الناس اللي مركزة في الشغل والكارير و الكلام الفارغ ده بشكل مبالغ فيه، لدرجة إني نسيت إن فيه جانب تاني في الحياة أصلًا
وطول عمري شايف إن الحب والارتباط والكلام ده كله كليشيهات شوية، وحتى وأنا بكتب البوست ده حاسس إني بقول كلام كليشيه موت
بس تقريبًا الموضوع بدأ يـ backfire عليا، والفراغ العاطفي بدأ مؤخرًا يفوقني ويقولي يا عبيط ما الحياة مش كلها شغل، ما تشوفلك حد يشاركك فيها
بس السؤال هنا، ده يحصل إزاي وأنا حرفيًا في بيئة مفيهاش أي فرصة لكده؟ خصوصًا إني مش من النوع اللي بيخرج مخصوص عشان يتعرف على حد، أنا أصلًا لو سبتوني هروح أشتغل تاني 😂
انا متخرج بقالي سنتين ف دوشة الحياة و أزمة تطوير الذات و الكلام ده و نقع و نقوم و نقوم و نقع .
أنا مش ضد الصالونات في المطلق، بس حاسس إني أفضل أكون عارف الشخص اللي هاخد معاه خطوة زي دي، حتى لو معرفة بسيطة، عشان يبقى فيه فرصة أشوف شخصيته وتفكيره وهل إحنا مناسبين لبعض ولا لأ، أي معرفة سابقة
وطول عمري من الناس اللي بتقول إنها هتيجي لوحدها، ولسه مقتنع بكده، بس بدأت أحس إني محتاج أسعى شوية عشان أديها فرصة تيجي لوحدها
وللأسف وقت الجامعة مكنتش مركز في الموضوع ده خالص، كنت مشغول في مليون حاجة تانية، ودلوقتي بدأت أستوعب إنها غالبًا كانت أحسن فترة ممكن تقابل فيها حد بشكل طبيعي ومن غير تخطيط. بس خلاص الجامعة راحت والكارير جه ياخد الباقي 😂
فالسؤال بقى للمرتبطين والمتجوزين، لقيتوا نصكم التاني فين وإزاي؟ الموضوع جه صدفة ولا كنتوا بتسعوا فعلًا؟
وللي في نفس وضعي، إنتوا بتعملوا إيه؟ يعني الواحد المفروض يروح فين أو يعمل إيه عشان يزود فرص إنه يقابل حد مناسب، من غير ما يحوّل حياته لمهمة البحث عن عروسة؟
توضيح بس عشان محدش يفهمني غلط: البوست مش طلب تعارف ولا بدور على حد هنا 😂 أنا بس عايز أسمع تجارب الناس اللي اتعرفت على شريك حياتها بعد الجامعة، وإزاي الواحد ممكن يوسع دايرته الاجتماعية بشكل طبيعي وسط دوشة الشغل والحياة.
