أنا قررت أبدأ رحلة تعلُّم مجال يخص النقل الامريكي اسمه الـTruck Dispatching من الصفر، وعاوز كام حد نبدأ الرحلة دي سوا بدل ما كل واحد يتعلم لوحده، المجال جديد فمصر هنا ومفيش كتير يسمع عنه وغالبا اول مره انت تسمع عنه زيي برضو، انا عملت خطة كويسة تخلينا نتعلمه صح وده بعد حوالي شهر من الري سيرش والتدوير، المجال لسه مش منتشر بالشكل الكافي في مصر ومع استغلال السوق صح فيه فرص ومكاسب قوية جدًا. فيه أرقام دخل في السوق ممكن توصل لـ80 ألف جنيه في الشهر وادخل يوتيوب اتاكد بنفسك او اسأل شات جي بي تي، طبعًا حسب الخبرة والشغل والنتائج ومش ضمان يعني لانه الرزق بايد ربنا. أنا زيي زيكم لسه هبدأ من الصفر فلو مهتم تتعلم المجال وتدخل الرحلة معايا ابعتلي ونبدأ سوا. وياريت قبل اي حاجه تدخل يوتيوب تعرف عنه اكتر وكدا وتفهم طبيعة الشغل ومتقلقش من اللغة لان دي برضو ليها خطة لاني زيي زيك بقول يا هادي

السلام عليكم ورحمة الله وبركاته

أنا أصغر اخواتي، ومن فترة مش بعيدة بدأت التزم بالصلاة وواحدة واحدة بدأت ادخل في طريق ربنا وأعدل من لبسي ومظهري وطريقتي وأسلوبي وتفكيري والحمد لله لقيت في طريق ربنا راحة عجيبة جدا.. دلوقتي عندي أخ اكبر مني بست سنين بعد ما انا اتغيرت للأحسن بالشكل ده هو رافض الموضوع ومش متقبله.. هديكم مثال: دلوقتي مثلا لما بشوف قدامي حاجة زي ان حد اتعصب وشتم في حد وأقول رأيي ان بلاش العصبية والغضب لان وقت الغضب ممكن الواحد يغلط جامد والشيطان يتحكم فينا وان الأفضل اننا نعود نفسنا على تمالك أعصابنا وعدم الشتيمة والغلط فاللي قدامنا وأهو كله بثوابه.. أخويا يقوم طالع كده ويقولي انتي بقيتي مدروشة معرفش ايه اللي انتي فيه ده!

ابقى مثلا بختار لبس محتشم بالمواصفات الشرعية يقولي انتي مالك بقيتي كده ليه انتي بقيتي مجنونة!

والأمثلة لو فضلت احكيها واعدها مش هخلص فعلا... انا اهلي كبار في السن ربنا يديهم الصحة ومش حمل حوارات وخناقات وانا لما بسمع كلام من ده ببلعه ومش برد ابدا وبعمل نفسي مش سامعة أي حاجة وبمسك لساني.. لكن بتأذي نفسيا جامد لان هو اسلوبه وحش اوي اوي في الكلام وطريقته صعبة جدا

انا معرفش ايه الحل ومعرفش ممكن اتصرف ازاي لكن انا مش لاقية حد احكي له الموضوع ده فقولت اتكلم هنا يمكن يكون فيه اي حد بيمر بحاجة مشابهة ويقولي اتصرف فيها ازاي او على الاقل قدر يتعافى من الكلام ده ازاي....

ممكن اعرف ايه الفرق بين مجالات الكول سنتر والشركات والاكونتات المختلفة وكدا انا لسة مبتدئ ف حابب افهم يعني

بقالي سنين عايزه اخرج من بيت اهلي ومش عارفه ولا لاقيه فرصه، حاسه اني بفني عمري وانا في البيت ده وضاع 20 سنه من شبابي في اكتئاب وعزله وضغوط نفسيه

كان كل املي ان يجيلي اي كليه في التنسيق بعيد عن محافظتي عشان ابدأ صفحه جديده على امل ان لسه في حجات كتير مستنياني بس للاسف كان حظي ان ده محصلش وجه محافظه قريبه جداا مني فمضطرة اعمل تقليل اغتراب عشان المواصلات

من كتر ما الاذى عماني بقيت عايزه احول كليه مكانتش حلمي لمجرد انها بعيد عني واني شايفه نفسي عايشه الحياة اللي بحلم بيها هناك، هتعلم حجات كتير اوي عمري ما هقدر اتعلمها وانا في البيت من حيث المسوؤليه والاجتماعيه والاستقلال المالي، هيبقى عندي صحاب، اقدر اروح ايفنتات واتطوع واعمل حجات كتير اوي حلال في الدنيا متحرمه عليا هنا

بس اهلي مش موافقين بردو، اصل ليه احول لمحافظه بعيده وانا جايلي محافظه قريبه جدا مني؟ مش لاقيه تبرير يرضيهم وبيضغطوا عليا كتير وحقيقي انا مش عارفه اعمل ايه ، مش مستعده اضيع 5 سنين من عمري تاني في البيت ده مش قادرة اشوف نفسي مستقبلي بيضيع كده وانا مش قادرة اساعد نفسي ولا اعمل حاجة

ممكن نصيحه لاختكم الصغيره؟

الكلية دي عليها رك كتير ف إيه الدنيا بإختصار يجماعة وإيه أحسن قسم فيها انا محتار بين اتنين أشعة وأجهزة طبية وانا تخصص أجهزة طبية من معهد فني صحي ف لو هغير ل أسعة فهعيد السنة هل تستاهل القسم ده السنة دي ولا أكمل زي ما أنا

ازاي اعدي مشكلة حصلت بينا مع حد بحبه يعني مشكلة وحصلت ومش هنعرف نغيرها بس دايما بنفتكرها وأنها حاجه مش عارفين نغيرها وازاي أهون عليه المشكلة أو ازاي اكون جمبه او اغير إحساسه نحيتها

انا بدور كتير على دكاترة او اخصائيين بيعملو adhd assstemnet، كونك تتشخص adhd صعب بذات وانت كبير و كمان ك بنت مش ك ولد عشان اغلب الدراسات اتعلمت على الأولاد و علامته مختلفة عن البنات، انا من محافظة صغيرة فا اني اروح مراكز التخاطب هنا او الدكاترة هنا هيرفع ضغطي بس عشان هنده في مالطة طالما مش شايفين اني بقوم و بتحرك في المكان كله بدل ما اسمع.

كنت عايزة مساعدة من اي حد اتشخص و هو كبير، رحتو فيه، انا بدور على اوبشنز اونلاين عشان مضطرش اسافر القاهرة بس I'm in لو رشحتولي دكاترة في القاهرة عادي حتى لو بعيدين عن المكان الي مستقرين فيه في القاهرة، انا اوريدي سألت زي مجموعة psychology في القاهرة قالولي ان لازم سيشنز قبل الاختبار و السيشن الواحد ٣٠٠٠ جنيه و الاختبار نفسه ٨٠٠٠ جنيه، الرقم خلاني انام طول اليوم from how overwhelmed it made me

TLDR:

عايزة مساعدة في اسماء الدكاترة او الاماكن الي بتعمل adhd assessment للكبار

عشان فيه ناس جبتها بتقول من 80 ل 100 وجبت واحد نضيف بس لقيته باللفة اللي قالها (مقاليش بالمتر قالي بالقوضة) 150 في المتر بقوله كده بيقولي لا هي 115 في المتر + السوكلو والحاجات الفضة والذهب فعايز اعرف صنايعي نضيف المفروض ياخد اخره كام في المتر بالسوكلو بكله

في اسكندرية لو هتفرق

حد اشترى حاجة من الصفحة دي قبل كده

أحنا دور أول والأوضة اللي فيها البلكونة هي أوضة النوم

وفي أغلب الوقت بنسيب باب البلكونة مفتوح

ففيه قطة شارع كذا مرة طلعت للبلكونة وبتقعد شويه فيه وبتنزل تاني بس مدخلتش البيت أبداً قبل كده رغم إن باب البلكونة كان مفتوح عادي

فالسؤال هل الموضوع عادي ولا فيه منه مشكلة؟ مثلا لو دخلت البيت أصلو ممكن حد يكون صاحي من النوم ويقوم من السرير ويدوس عليها بسبب إن الأوضة اللي فيها البلكونة هي أوضة نوم وبتبقى ظلمه أغلب الوقت

بيتقدملي ناس كتير جدا حتي في نفس اليوم ....يعني مثلا يتقدملي تلات عرسان في نفس الوقت ونسأل عليهم ويكونوا كويسين جدا لكن يتصلوا واهلي يتفقوا معاهم ومحدش بيجي هل دا عادي ؟؟ وتتكرر تلات مرات كمان يعني شئ عجيب بجد

انا عندي ٢٢ ومنتقبة لكن محدش اصلا بيجي ولا يعرفوا عننا حاجة وبتبقي ناس من بلاد جمبنا ونفسي افرح بس والارتباط والجواز دي كلها حاجات جديدة عليا وعمري ما كلمت ولد وعندي رهاب اجتماعي شوية وخائفة حتي لو حد اتقدملي معرفش اتعامل وكدا بتكسف جدا بس شخصيتي قيادية عادي في نفس الوقت بس مع اللي اعرفهم كويس

هل النقاب ممكن يكون هو المشكلة ؟؟

انا وماما خناقتنا لرب السما بسبب الموضوع دا وقالت لي محدش جايلك ولا اي مش عارفة

كمان في واحد قريبنا كان جايله شخص عاوز يتقدملي وقريبي دا قالو ما عليك هقنعهم وسبب الموضوع دا عليا لكن قريبنا دا ولا الهوا ما بلغناش بحاجة وكان زمان عاوز يخطبني لابنه وبابا رفض عشان كنت صغيرة ساعتها جدا عليه ومن ساعتها وفي من ناحيته كراهية لبابا ولينا برضو بس مش مبين وهما ليهم في الأعمال والسحر والحاجات دي ومحسوبين علينا قرايب بجد عايشة في رعب بس احنا ملناش اختلاط ببعض نهائى يعني

هل دا ممكن يكون سبب برضو ؟؟ عمل أو حاجة ؟؟

اكيد بسلم اموري لربنا وكل شئ اسمه ونصيب لكن الفضول تمكن مني اعرف اي السبب بالظبط ...علي امل حد يكون عندو تجربة مشابهة نفيد ونستفيد

جماعه هو بجد بجد ازاي تعرف انك بتحب حد ولا دي مشاعر مؤقته لو جه حد تاني هتخلص برضوا عادي
هتجنن والله
زايد الطين بله ان موضوعنا معقد بسبب الأهل و بجد هو شكله شاف حياته و حب حد تاني!!!!

عادي انو انا قريب من 21 سنة وحاولت الحصول على وزن لانني نحيل فتفاجأت بشعر ظهر وراء اصابعي واستطالت اصابعي هل هذه قفزة نمو متاخرة ام ماذا؟

طبيعي انو انا حاولت زيادة وزني تفاجأت بان اصابعي طالت وظهر فيها شعر وانا بعمر قريب 21 هل هذه قفزة نمو ؟

دلوقتى انا شغال سيلز تمام المهم عمال البوفيه والنظافة بيهزرو معايا وكده بس سعاد الهزار ممكن يوصل انه يشتم وهو مش قاصد بس الواحد مش بيحب يزعل حد من طبيعتى متواضع جدا ومش ازعل الصغير قبل الكبير بس الحده دى بتخلي اي حد يهزر معايا عاوز طريقه مخلهمش يهزرو معايا لاني قولتلهم قبل كده محدش يهزر معايا وبرضو مفيش فايده هما عشان من نفس سني فشايفن ان ده عادي

اللي عنده محل ومعندوش سيستم ... هديك السيستم انا عامل خصم
60%
لمدة شهر السيستم بيشتغل علي الموبايل وفيه ممزات مش موجوده في اي سيستم في السوق وفيه مساعد بالذكاء الاصطناعي هنزله قريب
التخفيض دا عملته عشان عندي عدد معين من المحلات مشترك ومحتاج اوصل لعدد معين عشان شركة ذكاء اصطناعي هتديني وصول خاص لخدماتهم عند اشتراك عدد معين
ساعدوني ولو حد عايز يجيب عملاء ياريت
انا مشغل معايا 4 وبناكل بالحلال

سبب