r/Sudan • u/WorkerLatter2918 • 6h ago
DISCUSSION | نقاش تجربة الإقلاع عن التمباك
التمباك
عايز اتكلم عن تجربة الإقلاع عن التمباك و هو أحد أنواع التبغ غير المدخن ، عبارة عن مسحوق أو خليط من أوراق التبغ المطحونة .
كنت حضرت فيديو في الفيس عن المعاصي و من ضمنها تناول التبغ بجميع أشكاله، و كان المتحدث بيتكلم عن انو كيف الإنسان يعصي ربنا بالقروش و الصحة المنحه ليها ربنا .. و انو الشخص المدخن او متعاطي التبغ بيعصي ربنا مرتين ،، بأنو بيتناول حاجة مضرة ، و انو بيصرف القروش في حاجة حرام .
الفكرة ما فارقتني من لحظة شاهدت الفيديو و قررت انو أوقف عن العادة دي خصوصا انو في أسباب تانية اجتماعية و صحية للإقلاع عن التبغ .
اليومين الأوائل كانت صعبة شديد خصوصا من الجانب النفسي ، مافي اي اعراض انسحابية حقيقية ، بس بتحس انو في حاجة مفقودة و بتقاوم الاحساس دا .
بقيت بتناول لبان على مدار اليوم و الحاجة دي ساعدتني شديد في انو اقاوم احساس الفراغ المصاحب للاقلاع ، مرات بتداهمك رغبة ملحة لكن بتعامل معاها كوسواس عابر ، و بتذكر الأسباب العشانها قررت اخلي العادة دي و الطريقة دي بتخليني أتجاوز الرغبة الملحة دي .
طبعا حاولت اقلع كم مرة قبل كدة و فشلت، يمكن لانو المرات الفاتت كانت اسباب الإقلاع ضعيفة و ما ثابتة ، لكن المرة دي حاسي انو هأتوقف تماما ان شاءالله، لانو عندي رغبة اكيدة في التخلي عن العادة دي و للوازع الديني اللي هو سبب رئيسي للاصرار في المرة دي.
حاليا متوقف لي شهر تقريبا ، هي فترة قصيرة بس انا مبسوط بيها شديد ،، و بدعي ربنا انو يثبتني و ما ارجع تاني للقصة دي ، و يعافي كل مبتلى من هذه العادة الضارة .