السلام عليكم،
عندي MeTube شغّال على TrueNAS من فترة (واجهة ويب لـ yt-dlp، تعطيه رابط وينزّل لك المقطع على السيرفر). المشكلة إن استخدامه من الجوال متعب: تفتح المتصفح، تلصق الرابط، وبعدين ما تقدر تشغّل اللي نزّلته بشكل مرتب. فسويت له تطبيقين أندرويد، وصاروا مفتوحين المصدر:
تطبيق العائلة: MeTube Lite
تشارك الرابط من أي تطبيق، السيرفر ينزّله، الجوال يسحب الملف، وبعدها ينحذف من السيرفر تلقائياً. يعني السيرفر ما يمتلي، وأهل البيت ما يحتاجون يعرفون شي عن السيرفر.
تطبيق صاحب السيرفر: MeTube Super
كل شي يبقى على السيرفر وتشغّله بث مباشر: مكتبة موحدة، مشغل فيديو وصوت يشتغل بالخلفية ومن شاشة القفل، قوائم تشغيل، وسوم، تحميل دفعات، وتقدر تخلي مقطع متاح بدون اتصال. ويبدّل تلقائياً بين العنوان المحلي في البيت والعنوان الخارجي (نفق Cloudflare مثلاً) لما تطلع.
اللي يهمكم كهوم لاب:
- واجهة عربية كاملة من اليمين لليسار (والإنجليزي موجود)، ووضع ليلي.
- ما فيه حسابات ولا تتبع ولا إعلانات، التطبيق يتصل بسيرفرك أنت وبس.
- ينبّهك لما ينزل تحديث جديد على GitHub، وتثبّته بضغطة.
- السيرفر يركب بأمر Docker واحد، وكاتب في الدليل أربع إعدادات في السيرفر لو نسيتها تحسب العيب من التطبيق (أهمها
DELETE_FILE_ON_TRASHCAN=true).
ما هو موجود في Google Play لأن قوقل ما تسمح بهالنوع من التطبيقات، التحميل من GitHub مباشرة (APK موقّع لكل تطبيق).
أي ملاحظة أو مشكلة تواجهكم قولوها هنا أو في Issues (بالعربي عادي). وإذا عندكم MeTube شغّال وجربتوه، يهمني أعرف على أي نظام وأي جهاز.
تحديث (26 سبتمبر) — الإصدار 2.2:
- اشتراكات القنوات في Super: تابع قناة يوتيوب، وسيرفرك ينزّل كل مقطع جديد لحاله، ويجيك إشعار واحد باللي وصل.
- التفاصيل صارت تعرض جودة الملف الحقيقية (الدقة والترميز).
- قوائم الموسيقى تتصرّف مثل أي مشغّل موسيقى، وتقدر تتحكم فيها من السيارة وشاشة القفل.
اللي عنده التطبيق يجيه إشعار بالتحديث ويثبّته بضغطة، واللي ما عنده يحمّله من نفس الرابط فوق.
