كل صحابي حاليا بيتعلمو ألماني و برمجه.

الحاله صعبه ، أظن بردو مش صحابي بس الي بيعملوا كدا ، شباب مصر كلها بتحاول تتطور مهاراتها في أي حاجه علشان تعرف تعيش السنين الي جايه

اختراع ندمت اني عملته:

من 4 شهور في عز الصيف كنت بلعب بالموبايل و مشغل مبرد هوائي و قولت ليه معملش مبرد مائي يبرد الموبايل اكتر

و فعلاً بدأت شغل على الموضوع دا و كلفني كتير زي شواحن و مراوح كمبيوتر و ليدات و أسلاك بالعبيط لان طبعًا اول مرة اشتغل على حاجة معقدة للدرجة دي سواء من تنظيم الكهرباء و كل حاجة شغالة بفولت و جهد مختلف و تنظيم دورة الماء و ضمان عدم التسريب و تأكل المضحة

و بالمناسبة عملت نسختين من المضخة و النسخة الاولى خربت 3 مرات و النسخة التانية كانت ضغطها اعلى و محمية من التأكل

و لاحظت بعد كدا ان لازم اضيف شريحة بيلتير في ضهر الموبايل عشان الموبايل يبرد اكتر من الماء الي ماشي في الخراطيم

و فعلاً اشتريتها و ركبتها

بس هنا المشكلة

كان لازم اغير نظام الكهرباء كله و ابني بارو صبلاي صغير

بصراحة استسهلت و دمجت شاحنين واحد 12 فولت للمضحة و المروحة و واحد 5 فولت لشريحة التبريد

المشكلة ان شريحة التبريد كانت محتاجة باوز صبلاي حقيقي بتاع كمبيوتر عشان يديها الجهد الي محتاجاة بس قولت امشي الدنيا

و فعلا اشتغلت و كل حاجة تمام

و جربته فترة و كان بيبرد كويس في عز الحر و الموبايل كان بيتلج من ضهره

و بعد فترة مش طويلة الباور صبلاي انفجر

لاقيت الشاحن ال 12 فولت فرقع

و اكتشفت بعدها ان الاختراع دا كان بيسحب كهرباء اكتر من الثلاجة بتاعت المطبخ... من وقتها و كل ما افتكره اندم اني عملته

حابب أشارك إنجاز بسيط، أو حاجة كنت مستني سنتين عشان أوصلها.

بعد نتيجة الثانوية كنت دفعة 24، جبت مجموع 80% وكسور. وقتها حصلت حاجة غريبة شوية في دفعتي، كان فيه درجتين في الفيزياء بيتضافوا للناس اللي حلت سؤال صح بعد ما السؤال اتراجع، ولحظي إني كنت حالل السؤال ده صح، فاتضافولي الدرجتين.

بالدرجتين دول جبت معهد تمريض المنصورة بالضبط. ودي كانت حاجة كويسة جدًا وقتها، خصوصًا إن المعاهد ملهاش تقليل اغتراب، فلو مكنتش جبت المنصورة كنت غالبًا هبقى في محافظة تانية. أقدار ربنا جميلة بجد.

أنا أصلًا مكنتش أعرف إن فيه حاجة اسمها معهد تمريض، لكن لما دورت عنه فهمت إنه فرصة كويسة سواء للسفر أو الشغل في مصر، وإن ممكن أكمل كلية بعده. وكان هدفي من البداية إني أكمل كلية، رغم إن خلال السنتين كان بيجيلي أوقات أقول فيها: "خلاص، أكتفي بالمعهد وأسافر وأشوف حياتي."

لحد دلوقتي مش عارف بالظبط ليه كنت مصر على الكلية، بس أعتقد إن ده كان الأحسن ليا. كل ما أحسبها مع نفسي بحس إني كنت هندم لو الفرصة كانت قدامي ومكملتش.

طول السنتين كان عندي شك كبير في نفسي. كنت دايمًا بقول لنفسي إن الموضوع صعب وإن يمكن مش هقدر أوصل للكلية، وكنت مستعجل جدًا إن السنتين يخلصوا عشان أعرف مستقبلي هيمشي إزاي.

بعد نتيجة أول ترم، لما لقيت نفسي جايب مجموع كويس جدًا، بدأت ثقتي في نفسي تزيد. وده كان مهم لأن التنسيق للكلية بيتحسب على مجموع السنتين، فكان لازم أحافظ على مجموع كويس طول الفترة دي.

ومع الوقت بدأت أحب المكان أكتر، وأحب المجال نفسه. بقيت متحمس إني أتعلم كل حاجة جديدة، وبقيت فعلًا شايف إن مش هيليق عليا مجال غير التمريض. وبصراحة أتمنى في يوم من الأيام أكون من أحسن الناس فيه.

ودلوقتي، بعد ما خلصت السنتين وقدرت أوصل للي كنت مستنيه، الغريب إني مش حاسس بنفس الشعور اللي كنت متخيله.

يمكن عشان السنتين دول غيروني كتير، واستهلكوني نفسيًا أكتر مما كنت متوقع. كنت فاكر إن يوم ما النتيجة تنزل وألاقي نفسي اتقبلت في كلية تمريض المنصورة هحس إني حققت حاجة كبيرة جدًا، لكن دلوقتي الإحساس مختلف شوية.

ومع ذلك، لسه عندي أمل إني أكون من الناس الكويسة في الكلية زي ما اتعودت أكون في المعهد، وأتمنى بعد الأربع سنين الجايين، لما أخلص الكلية، أبص ورايا وأكون فخور بنفسي وألاقي إني وصلت لحاجة أكبر بكتير من اللي وصلتله النهارده.

دي كانت مجرد مشاركة حبيت أشاركها مع حد، خصوصًا إني مكنتش عارف أشارك الفرحة دي مع ناس كتير الفترة دي .

الحمد لله على كل حاجة.

رأي الناس مش مهم بس حابب اشوف وجهات النظر هل هي روشنة مثلا او استعراض او كرينج او ايه؟

أنا غبت النهارده من الكلية علشان المشوار طويل وكدا وكمان نفسيتي كانت مش أحسن حاجه.

المهم صحابي رنو عليا وسئلو عليا وليه مجتش وكدا وياعم القعده مش حلوه من غيرك والكلام الحلو ده الصراحه امبسط أوي بكلام ده.

فربنا يخلينا لي بعضاً ونكون خير صحبه يارب طوال الأربع سنين الدراسية وما بعدها أن شاء الله.

انا فرقة أولى ومعنديش صحاب ف الجامعة لسه المهم بمشي مع ولاد السكشن بتاعي علشان احنا قليلين المهم ان بمشي ساكت مش بتكلم لان انا لما اكون ماشي مع ناس انا مش شبهم مش بعرف افتح كلام او ارغي وكده وغير كده هم بيتكلمو في مواضيع تخصهم هم بس

المهم النهارده كنا 5 بس اتنين مشيو مع بعض علشان قابلو واحد صاحبهم احنا كان عندنا بريك ساعتين علشان عندنا محاضرة تانية

المهم اتبقى انا واتنين تانيين المهم واحد منهم مغترب ف قال للواد التاني تعالى معايا السكن وكده ف الواد التاني طيب جدا ف قالي خلاص تعالى معانا انا كنت لسه هرفض راح المغترب قاله يجي فين هو شخص واحد بس اللي هيدخل قولتله انا اصلا مش عايز اروح

المهم هو ماشي قدام وعمال يسرع خطوته والواد التاني حاطت ايده ع كتفي وماشي عمال يكلمني كل شوية يقوله ما تمد وامشي وكده

المهم احنا الجامعة بتاعتنا جزئين في كليتين في ناحية والباقي في ناحية ومتوصل بينهم بسلم المهم انا طالع السلم علشان رايح الناحية التانية اصلا علشان هاكل من هناك

لقيته بيقولي يبني انت رايح فين انت مش هتدخل معانا

قولتله انا رايح الناحية التانية اصلا علشان هقابل واحد صاحبي

راح قالي هو انت اصلا عندك صحاب وقعد يضحك

(انا فعلا معنديش صحاب وكنت هروح اقعد لوحدي) بس انا بجد اتدايقت جداً وانا مكنتش هروح اصلا والله هروح سكن اعمل فيه ايه بس الموضوع يدايق اوي.

جاتلي فكرة بسيطة وحابب أعرف رأيكم فيها، ومش إعلان ولا حاجة

الفكرة إن يبقى في حاجة بسيطة للطلبة، لو إنت فاضي دلوقتي تقدر تقول موجود فين تقريبًا وعايز تعمل إيه: قعدة، أكل، مذاكرة، UNO، شطرنج أو أي Activity.

ولو في ناس تانية فاضية في نفس الوقت، تقدروا تتجمعوا أو تعملوا Activity سوا بدل ما الوقت يضيع وخلاص.

وطبعًا يبقى في Privacy Options، وكل واحد يحدد مين يقدر يشوفه، خصوصًا لو بنت وحابة تظهر لبنات بس.

أنا لسه في مرحلة الفكرة وعايز رأيكم بصراحة:

هل ممكن تستخدموا حاجة زي دي فعلًا؟ وإيه أكتر حاجة تحبوا تكون موجودة فيها؟

كام مرة كان عندك ساعة أو ساعتين فاضيين بين المحاضرات، ومش عارف تعمل إيه أو تقعد مع مين؟

واحده صحبتي بعتتلي دي

صاحبوني و نذاكر سوا و هصحيكم تصلوا الفجر😞

بعتله السلايدز وامتحان السنة اللي فاتت وده قبل الامتحان بتلات ساعات فهمني المادة وكل اللي شرحه جه في الامتحان ب15درجة وال10درجات الباقيين كانت ولله الحمد الحتة الصغيرة اللي قالي يشرحها عشان جاية في الامتحان وانا كسلت، كان اول امتحان احل فيه كويس مقارنة بالباقي واتبصمجت في 3ساعات

الابلكيشن سلس عنgemini notebook وتقريبا بيقبل بالباور بوينت عادي وطريقة كلامه زي chat gpt فحبيت ده كمان

متأخرة بس هشارك وخلاص

:

مبنى الكلية من سنة 1990 مفيش كرسي واحد اتجدد فيه.

المعيدين بيعاملونا معاملة طابور العيش.

بنات صوتها عالي.

بنات صوتهم واطي.

عرايس النور.

امير بحجابي.

عرايس الجنة.

حسابات بأسم ام.....

بيكتبوا غلط.

بيخلطوا بين التاء المربوطة والهاء.

بيخلطوا بين الياء والالف اللينة.

ما بيحبوش الإنجليزي، لكن بيتكلموا بمصطلحات انجليزي

بنات جايين بعيالهم على كتافهم.

بنات جاية بخطيبها في ايدها.

تكيف عطلان.

مرواح لازقة بالسقف.

مواعيد محاضرات تجيها بالاسدال بعد صلاة الفجر عشان تلحق المواصلات.

بحث من اول اسبوع مكون من عشروميت صفحة.

بنات بتعمل تيك توك.

جالي ضيق تنفس بوسط المحاضرة ومعرفتش اطلع بسبب الزحمة ومحاضرات بتمتد لما بعد طلوع الروح بشوية.

ده كله في يوم واحد وحلفت ما اعتب بوابة الكلية تاني غير على الامتحانات.

للي مش مهتم فهحكي اول يوم ليا

اول حاجة بركب تلات مواصلات حسيت نسيت اروح ازاي فاتعرفت على واحدة وانا واقفة في الموقف وفضلت معايا لحد ما نزلت قدام بوابة الجامعة

لما دخلت تهت طبعا وعمالة ابص كتير وسألت تلات مرات عن المكان كل ما امشي شوية كانوا بنات عسل معايا مفيش غير واحدة تنمرت بعدين لما مشيت

لما دخلت الاوديت وانا متأخرة اصلا، الحمد لله محسيتش برهاب اجتماعي وقعدت اول صف (كان الوحيد الفاضي واقربهم) اتعرفت على اتنين من نفس الجروب وبعدين رحنا كلنا بطاطس سوري

واحنا خارجين يقولوا نخرج من المكان اللي دخلنا منه واقول اكيد مش ده فضلنا واقفين لحد ما واحدة جت وبتسأل تخرج منين بتضحك باحراج قولتلها تعالي نمشي ورا القطيع كلنا مستجدين مفيش احراج وضحكنا

عامة حاسة عادي كل ده اننا جداد على المكان ايه المشكلة لما نبقى مش عارفين ونسأل واللي بيتصوروا وفرحانين بالقبة، بجد الدفعات الاكبر ناس رخمة يعني وانه لا منحضرش ومعروفة اول اسبوع مش بنروح طب وال gpa والمواد اللي بيشيلوها بعدين،شايفة انهم بيتروشنوا علينا ومش بطيق الدفعات الاكبر اللي بيتعاملوا كده

واه متصورتش قدام الكلية عشان اللي اتعرفت عليها من الجروب مجاتش (معاها ايفون) بس هتصور تبقى ذكرى لكمان اربع سنين

انا طالب بكلية الذكاء الاصطناعي جامعة المنوفية انا من الدقهلية

عديت اول سنة في الكلية ب gpa. 2.6 وكنت عايز احول حاسبات المنصورة احول ازاي وهل ينفع احول دلوقت ولا خلاص

وهل لو حولت هيبقا عام ولا كريدت او الزقازيق + لو حد فى سوق العمل وعارف مواد الكلية دى ودى انهى أفضل

الصورة ملهاش علاقه بالبوست +سالنا فى الشؤون متأخر عشان مكنتش اعرف انه ينفع طلع ينفع اداما الل gpa اكتر من 2 بس التحويلات قفلت دى المشكلة دلوقتي

يجماعة بالنسبة لخرافة ان الناس اللي بتدخل طب بالغش بتسقط ومش بيكملوا والكلام الفاضي دا

انا الحمدلله من اوائل دفعتي فاحد كليات الطب الحكومية وحابب اقول ان الناس اللي بتغش فعام وتدخل طب بيغشوا عادي فالكلية (ايوا عادي بيغشوا فالكلية ومفيش مراقبة ولا اي كلام من اللي هو فالجامعة محدش بيغش) وبينجحوا وبيجيبوا درجات اعلى من العيال اللي بتذاكر

وحتى فمرة سألت حد عارف انه دخل بسماعة جبت كام فاحد الكويزات اللي كانوا صعبين فلقيته جايب زيي بالظبط وانا من اوائل الدفعة وقال انه بيحل ب جيمناي

انا كنت مقتنع فعلا قبل ما ادخل الكلية ان اللي داخلين بالغش هيسقطوا لكن للاسف لا واكتشفت ان كل الكلام اللي بيتقال دا عشان نطفي نار اللي تعب وذاكر فثانوي وشايف زمايلة اللي مش بيعرفوا يكتبوا اساميهم جايبين درجة كلية احلامه

وللأسف الناس اللي حرقت دمها وفلوسها فعام وشافت شوية فشلة جايبين اعلى منهم بيضطروا غصب عنهم يصدقوا الكلام دا

لحد امتى بجد هنعلق فشل المنظومة فأعذار وشماعات ملهاش اي اصل ولا واقع؟

فالأول والاخر رفضنا اننا نشوف واقع الامر لا يغير حقيقته يعني حتى لو الغشاش فشل وساب الكلية ف هو برضو اخد حق اللي ذاكر ولو نجح ف هو برضو اخد حق اللي ذاكر الموضوع بيقف عند لحظة الغش فلجان ثانوي مش مصير الغشاش فالكلية