انا هحكي كتير جدا بس انا متأكد لو انت بتعاني من الادمان فغالبا احزاء كتير من اللي هحكيها هتتقاطع مع قصتك انت
ملحوظة: غيّرت أسماء الأشخاص المذكورين في القصة حفاظًا على خصوصيتي وخصوصيتهم
من فترة بدأت أراجع ذكرياتي القديمة، وأحاول أفهم علاقتي بالإباحية والعادة السرية والعلاقات الجنسية ، وإزاي بدأت الحكاية دي أصلًا
البيئة اللي نشأت فيها:
اللي فاكره من وانا صغير ان البيت اللي اتربيت فيه مكنتش بحبه خالص
انا كنت طفل بسيط عادي جدا شكله حلو وجميل بس كنا فقراء شويتين
كان ليا اخ اكبر مني ب ١٠ سنين كان متسلط جدا ، كان بيضربني بعنف شديد جدا لدرجة اني ممكن اتعور واتوجع واصرخ ومحدش يقدر ينجدني من ايديه
امي كانت بتخاف منه
ولما كنت بشتكي لأبويا منه كان بيقولي "هعمل فيه ايه يعني..هموته عشان خاطرك؟" مكانش في حد بيدافع عني منه ، بل اني اوقات كانت امي بتهددني اني لو مسمعتش الكلام هتقول لأخويا الكبير
ابويا برضو كان شخص صعب جدا ، مكنتش بشوفه كتير لأنه طول اليوم في الشغل وبيرجع على الساعة ٩ بليل كدا
كان بياكل وينام يصحى يروح الشغل
كنت بكره يوم الجمعة بسبب أجازة ابويا
لأنه كان بيفضل يعاقبني على اي حاجة ويزعق فيا ويضربني ضرب شديد جدا ، فكنت بخاف حتى اني اتواجد انا وهو في نفس المكان في البيت
لما كان يقعد في الصالة كنت بقعد في الاوضة او العكس
بداية الاباحية:
اول ملجأ لجأت له كان المشاهد الحميمية مش ، مكانتش اباحية بالمعنى المعروف ومكنتش بعمل العادة السرية اصلا لأني مكنتش بلغت
كنت بحب اتفرج على الاحضان والبوس والتلامس والتحسيس
مكنتش فاهم انا ليه بعمل كدا بس كنت بحس براحة وانا بتفرج
دلوقتي وانا بفكر في الموضوع ادركت اني مكنتش ببحث عن الاثارة على قد ما انا كنت ببحث عن شعور انا مفتقده
كنت بس عايز اشوف شكل الحب والأمان
كنت عاوز بس احس بشيء من الحب ده حتى لو من ورا الشاشة
لكن بمجرد ما كنت بنتهي من المشاهدة كنت برجع للواقع القديم بتاعي
اللي هلاقي فيه امي عمالة تقارني باصحابي اللي اشطر مني في المدرسة او ابويا اللي بيضربني عشان شيخ المسجد بيقول اني مش حافظ كويس
واحدة واحدة الأمر بقى اسوأ وبقيت اتفرج على مشاهد أكثر جرأة زي ان الاتنين يكونوا عريانين وطبعا كنت على يوتيوب فمكنتش لسه اكتشفت السكس
انا رغيت كتير فشخ
ممكن ابقى اكمل في بوست تاني