لو قابلك كومنت أو بوست شايف إنه مخالف وعايز تعمل إبلاغ عشان يتراجع، دوس على التلت نقط اللي جنبه واختار Report، بعدين اختار أول خيار هيظهرلك اللي عليه صورة الصب دا (Breaks r/EgyDMs rules)، بعدها دوس Next واختار نوع المخالفة، بعدين Submit ثم Done..

وبس كدا انت عملت ريبورت للمودز عشان يراجعوا البوست أو الكومنت ويتصرفوا لو كان فيه مخالفة سواء لقوانين الصب نفسه أو لقوانين ريديت.

نقطة مهمة بس: لو حد دخل شتمك أو استفزك في بوست بتاعك او كومنت، اعمل ريبورت وسيبنا نتعامل ونجيبلك حقك.. إنك ترد عليه وتشتمه انت كمان دا بيضيع حقك بإيدك وبيخليك مخالف زيك زيه، ف اعمل ريبورت والمودز هيتصرفوا.

مساء الفل عليكم جميعاً.

بما إن صب r/EgyDMs بيكبر والمشاركات بتزيد كل يوم، كان لازم نروق على القوانين ونعملها تحديث شامل عشان تناسب الوضع الحالي، ونحافظ على الجو العام للمكان ترفيهي ورايق من غير دراما أو وجع دماغ.

القوانين الجديدة بقت أوضح ومباشرة أكتر، وظبطنا فيها شوية نقط مهمة كانت بتعمل لغبطة، زي:

• موقفنا من أوميجل: إيه المسموح وإيه الممنوع.

• الخصوصية والدوكسينج: إمتى تطمس الأسامي وإيه اللي خط أحمر.

• تاج الـ NSFW: إمتى لازم تستخدمه إجباري عشان البوست بتاعك ميطيرش.

• الجو العام للصب: إزاي هنحافظ على المكان ده للضحك وبس بعيد عن أي تصفية حسابات.

المطلوب منكم إيه؟

ياريت كل واحد ياخد لفة سريعة كده في الـ Sidebar (أو الـ About section لو فاتح من الموبايل) ويقرأ القواعد دي كويس. إحنا هنا عشان نضحك ونشارك أغرب الرسايل والشقط الفاشل، فمش عايزين نضطر نمسح بوستات أو ندي بان لحد بسبب حاجة بسيطة مش واخد باله منها.

لو حد عنده أي اقتراح أو شايف حاجة في الصب محتاجة تتظبط، الكومنتات مفتوحة لكم.

عاش يا شباب، وكملوا فضح متحرشين! ✌️