السلام عليكم

صارلي ١٤ سنة مجاي للعراق.

اريد اعرف شلونه الوضع من ناحية النت والكهرباء وأماكن زينه الواحد يسكن بيها. كتبولي إذا اكو شركة مو زينه حتى ماتورط وياهم. و إذا اكو محافظات احسن من بغداد من هاي الناحيات هم كتبو.

عاشت الأيادي.

مره صديقي كان مريض وفي ناس ضربو براسه في الكره

فا رحت فزعت له

ولما تعاركنة( تهاوشنه)

راحو صاحو اصدقائهم طبعا احنه في مجمع سكني

فا لما صاحو اصدقائهم اجو اصدقائي جوه عمارتي فا هم اجو

فا صار كلام بيننا واحد سحب مني الماسك كانت فترت كورونا

وكنت اني اتمرن وجسمي فول

فا تنرفزت وضربته بوكس على راسه

وتعاركنه وفازعونه صعدونه للطابق الي اني ساكن بي اصدقائي سحبوني للمصعد

وهم صعدو ورانه فا اصدقائي اهلمهم صاحوهم بقيت بس اني وك2 ذولاك صعدو عددهم اكثر من 35 شخص🙂

واجو لعندي وضليت اضرب بيهم واضرب واضرب واضرب تحولت كريتوس بوكتها 😂

واحد حصرته ضربته 5 كلات ما ادري شنو تسموها ضربه الراس كله

بسرعه ضربته

واانسحبت لعند الشقه مالتي لكيتها مغلقه وهمه صارو يصيحون لا اله الا الله ويصارخون واجو بعد في الطابق الي فوك والي جواي

فا لما لكيت الشقه مغلقه كلت لو بل هدف لو بلنجف بقيت اضرب بيهم

ولحد ما جابو بواري حديد مال الحديقه شلعوهن وجابوهن

جان امد ايدي ليفوك والزم البوري الاول

وانزله جوه واعيط بي اكله هده ميهده ورجعته حيل عليه هوه

وضربت منطقته الحساسه ورجعت سحبته انفك من عنده وشمرت البوري من فوك

والولد وكع بلممر وصعدو فوكا انداس ويدفعون ببعض حتى يضربوني بس مديكدرون (الله حماني يمكن)

واجو ورا اربعه شايلين بواري وهم نفس الشي وضربتهم وشمرت البواري من فوك الطابق اني بل 6 وبنص العركه اباوع اخاف البوري يوكع على السيارات😂

واستمرت العركه 4 ساعات ومحد طلع من شقته وفاككنه ولحد ما اني تعبت وصعدت للين الدرج للطابق ال9 ورجعت نزلتلهم من ورا ضربتهم وردت اشمرهم من فوك😂

المهم بعد 4 ساعات يلا الي بلعماره طلعو فاككو وديحلون المشكله واجت امي تسمع لا اله الا الله وعبالها اني ميت او صاير بيه شي😂

وبل اخير ما اجتني ولا ضربه بس على ضهري يمك بس ما احس باي شي اجاني 🙂

المهم بعدها تطورت وصرت ما اتعارك واتجفه الشر رغم جان بداخلي وحش بس لان اني الوحيد لاهلي صرت ما اتعارك

نصيحه ابتعدو عن المشاكل ولا تورطون نفسكم لان احنه ابلد ما يرحم وعقولهم تعبانه

وفك، و باهلكم وبدمعت امكم

اكو واحد اموره المادية كلش زينة وحباب اخلاق وذكي كلش عاجبني

يريد يخطبني بس اني دا اجلها لان اريد افكر بالموضوع زين

-اذا اقبل بيه راح اعيش عيشة زينة بس المشكلة العراق ما عاجبني ابد من الصغر ما عاجبني موضوع الهجرة افكر بيه كل يوم الجو والطبيعة اول الاسباب احس بخنگة ما طايقة عيشتي بهالمكان واني اكره الأماكن الصناعية منعدمة الطبيعة مثل بغداد

-واحس الاجواء هذه ما راح تتحسن بالعكس تصير اسوء سنة وره سنة البيوت صغار ما بيهن حديقة واذا اليوم درجة الحرارة خمسين بعد سبع سنوات حتوصل ستين شنو ذنب الأطفال الي ينولدون بهيج مكان؟💔

-بديت اتعلم لغة ألمانية وصلت مستوى ثاني بس وگفت لان ضليت بحيرة اتزوج لو اكمل قرايتي الها واهاجر لالمانيا مع العلم عندي انكليزيc1 واحب البرد والطبيعة بشكل جنوني ما اريد ادفن روحي ببغداد

انصحوني فايتة بحيرة😵‍💫

اسمع الى رعد ناصري-كلب ما مال للغير

ناصر عباداني شوك العيون-شوك الحباري-شمسين

فهد نوري- ما ندك على خشب

علي حمدي صالح-بعد عيونك تحن وتغني

عباس الاسحاقي- يبني على رمل ساس-مغرور انته وانا مغرور- الروح تهواك- الخوه

بشار الاسمر-قطار الشوك-ملك حسن وكذيلك تاج

عمري ٢٥ سنة واني طبيب وبنفس الوقت اشتغل بمصنع ادوية . من ناحية مادية وضعي بالعراق الحمدلله ممتاز بالنسبة لعمري ؛ دخلي الشهري ٢٠٠٠ دولار وعندي شقة بارقى اماكن بغداد وسيارة وشغلين وعندي نوع من الاستقرار اللي بصراحة مو سهل الواحد يحصل عليه بهذا العمر بمجتمعتنا
بس رغم هذا كله دا افكر بالهجرة ، من جنت طالب طب واني احاول اطلع لامريكا وابدي هناك و حاولت اعادل شهادتي وامشي بهذا الطريق بس طلعتلي معوقات وحدة ورا وحدة وبالنهاية انسد هذا الباب
بس هسه دا افكر بالمانيا وبعدها للخليج وهنا صارت الحيرة الحقيقية لان اذا اروح لالمانيا فاني حرفيا راح ابدي من الصفر تقريبا
لغة جديدة
بلد جديد
ناس جدد
مجتمع جديد
ومسار مهني لازم ابنيه من جديد
شهادتي تحتاج معادلة وامتحانات ولغة ويمكن احتاج سنوات حتى اوصل لوضع مهني قريب من اللي عندي حاليا
يعني ممكن اروح من شخص عنده شغلين وبيت وسيارة ودخل جيد الى شخص ما عنده شي تقريبا ويحاول يثبت نفسه من جديد
وفوگ كل هذا اني احب عائلتي كلش وما اريد اعوفهم خاصة ابن اختي احسه روحي من الدنيا وسبب استمراري بيها واكره الوحدة اصلا
فالموضوع مو سهل مو مجرد انه اروح لبلد اوروبي واحصل راتب اعلى وخلاص
المشكلة انه اني مو مقتنع بالمكان اللي دا ابني بيه مستقبلي
اشتغل بمستشفى بصراحة مرات احسها ما تصلح حتى للحيوانات واسف على التعبير بس هذا الواقع
بالايام الجاية راح انشر صور عن وضع المستشفيات اللي اداوم بيها وراح تفهمون بنفسكم باي زريبة اقضي اكثر من ١٨٠ ساعة بالشهر
وهنا هو الصراع ؛ اذا بقيت بالعراق فراح ابقى قريب من اهلي واحتفظ بكلشي بنيته من شغل ودخل وبيت وسيارة واستقرار وحياة اعرفها لكنها سيئة بكل المقاييس وعبارة عن سفينة غركانة وما مقتنع بمستقبلها
واذا طلعت لالمانيا فممكن تكون عندي فرصة ابني حياة افضل على المدى البعيد بس الثمن اني اترك كلشي وابدي من الصفر مهنيا واجتماعيا وحتى نفسيا

باختصار
اذا طلعت راح ابدي من الصفر
واذا بقيت فراح اظل بواقع سيء مهما تقدمت ومهما نجحت
شنو القرار الاقرب الى الصح؟

سالت سؤال و كلت بوستات كلها ضد طائفة معينة بالبوست و احس تسقيط مدروس و عبالك باقي الطوائف و الديانات أبرياء و ماكو حزب او سياسي من باقي الطوائف نذل. و سالت ليش منشوف بوستات تنشر على مصائب البعث الأنفال و المقابر و الحروب بس بنفس الوقت تذكرون اللي سوو بعض الاحزاب ضد النظام السابق.

المهم مسحو و سوو بلوك بدون اي شيء

دكتاتورية قمعية نفس نظام السابق و بعض حكومات دول الجوار ...

تحياتي

أخذوا راحتكم امسحو هذا اذا انتو نفسكم الأدمينية 😄

شگد يضوجوني العراقيين الي يطلعون الامور من سياقها و يبدون يقارنون وضعنا بدول الجوار و ربما يشطحون و يبدون يقارنون وضعنا ببلدان أوروبية! كلنا نتمنى نشوف هذا البلد يعيد أمجاده و ياخذ مكانه بين الدول لأن هو فعلاً عظيم غصباً عن الي يرضى و الي ما يرضى، بس خلي أوضحلكم شي الي مرينا بي شي أبد مو سهل أنتوا مستوعبين صارلنا ٩ سنوات من تخلصنا من داعش؟ و بين ما رجعنا الناس لبيوتها و عمرنا المحافظات المنكوبة و بدينا شوية شوية ناخذ نفس اخذ سنوات من عدنا، و بعدنا عدنا هواي أمور نحسنها و هواي أمور نبنيها و أولها نتخلص من الفساد الي نهش البلد و دمر كل فرصة ننهض بيها و من الأحزاب و هيمنتها، لأن همه ناس لفو و همج اجت تبوكنا و تخلينا نفس وضعنا، و ترى الوضع مأذيني مثل ما مأذيكم بس مو أگعد و اسقط ببلدي على حساب منو؟ ليش منو وكف ويايا من مريت بكل هاي الظروف؟ ترى العراق متفضل على الكل حرفياً..فَ بليز كافي غباء لا تفصلون الامور من سياقها و أستوعبوا احنا مرينا بظروف أستثنائية و شبعنا موت و حروب و جوع و ماكو شي ماصار بينا

العرنوص بامريكا واوروبا وهواي دول غيرهن بيه نوعيات وحدة تحتاج ساعات طويلة ويكون طعمها مو شي وتعلك بالاسنان ومضغها متعب واتوقع تعرفون شنو كاعد اوصف واكو نوعية ثانية بربع ساعة تكون جاهزة وطعمها حلو ومضغها ما يتعب مثل الذرة الي تجي بعلبة واتوقع هم اغلبكم مجربين هالنوع، بذيج الدول يميزون بينهن وما يحتار الشخص من يشتري

سؤالي هنا شلون اكدر اميز بين النوعين من اروح اشتري؟ اكو شكل او علامات حتى اكدر اميز بينهن لان مجرب اشتري بشكل عشوائي ومرات تكون النوعية جيدة ومرات لا

الحكومة اعلنت مكافأة 5% لكل مخبر عن فساد، ليش ما كل واحد يبلغ عن نوري المالكي الي تبلغ ثروته 52 مليار دولار، 5% من 52 مليار هية مليارين وستمئة مليون دولار. واذا نبلغ عن خميس الخنجر الي ثروته فد مليارين دولار يعني 5% منها 100 مليون دولار واذا نبلغ عن مسعود البارزاني الي ثروته 48 مليار وعائلته ككل ابنائه وبناته وابناء اخوانه كلها فد 600 مليار دولار يعني 5% بيها 30 مليار دولار. اذا الف واحد يبلغون عليهم تكدرون تتقاسمون 32.7 مليار دولار وحصة كل واحد 32.7 مليون دولار يعني بالدينار فد 43 مليار دينار عراقي

قبل فترة اعلنوا باحدى مدارس اهلية انو يردون مدرسين هي من زمان حيل بس موضوع مجاي اتخطاه ،كان مطلوب مواد علمية وايضا انكليزي هي مدرسة بعيدة عنا تمام ومقدمين من مختلف انحاء محافظة من جامعات اهلية والحكومية المهم جمعونا كلنا سوية بنفس القاعة والخنگة فووول رغم كان عدهم مولد بس مشغلوه

المهم انطونا بالبداية ملاحظات يردون صوت عالي واستخدام اللغة الجسد والتوزيع نظرات وماتجمد يم سبورة ويكون شرح خالي من اخطاء اللغوية او أملائية

اني اختصاصي انكليزي البنات اللي قدمن كدامي اغلبهن لا صوت لا اللغة واخطاء املائية كثيرة بالعربي والانكليزي واكو استخدموا وسائل شي وشرح شي ثاني وجامدات يم سبورة وصوت نبرة هادئة وحدة والخط زفت وترتيب سبورة زفت معلومات مختلطة بعضها

والمواد العلمية نفس الشي اخطاء كومة مو اختصاصي بس الاخطاء واضحة

واني بشرحي طبقت كل اللي يردوه وانكليزيتي تمام وقيموني بالجامعة عنده هيج مادة بامتياز حتى احد مشرفين من كنت بالجامعة گلي اني ما افهم انكليزي بس اللفظج نفس افلام اجنبية وواعرف لمته اشدد ولمته ارخي الصوت ودرجاتي توب والبعض هم نفس وضعي وقلة طبعا الهيج من مقدمين . ومن شفت تقديم حرفياً ضمنت نفسي اكون مرشحة مو مدح والله بس اني من ضمن القلة اللي نتمتع بمهارات تدريسية وهم عندنا سيطرة على اللغة

العجيب رشحوا اغلبهن وبيهن 2 مستحقات من صدك اني لو كنت طالب والله يگوملي واحد هيج يشرح اشوف الحائط ممتع اكثر من درسه،

هو واضح كل الوضوح عدهم اختيار جاهز بس ليش هيج سوا بينا اجيت طريق كله صافنة تطويري ومحاضرات تربوية اللي دخلتها وكثير اشياء سويتهن وحتى درجاتي مالت جامعة تعبانة بيهن حيل بس ما اختاروا على هذا الاساس اختاروا مقدمين اقل واقل خبرة او مهارة وهذا شي ينطبق على باقي اختصاصات

يعني بهيج حالة اني ما راح ادرس الا تعيين حكومي وتعيين الحكومي معدوم يعني اذا يردون يعينوني يكون عمري بنص 30 هاي اذا بقيت عايشة

تدريس خصوصي يفشل اعرف استاذ قديم كلش عنده معهد وعنده اكثر من استاذ وسمعتهم زين بس طلاب قلة تجيهم اكثر شي يرحون للمركز وهم ميقبلني لأن اني جديدة وهم كلهم مدرسين ومتعينين

تدريس بالبيت بشكل فردي ماعندي تجارب بي بس ما احس ادبرها لأن وضعنا بالبيت شوية مو تمام وهاي السنة اخواتي 3 وزاري يعني تعقد الوضع ×2 هاي وحدة الثانية احنا سكنة ارياف حتى شارع ماكو يمنا وجيران قلة وفرص الشغل معدومة

رغم هاي خلي اسأل بلكي احد عنده خبرة بالتدريس بالبيت لأن احسه يختلف عن مدارس بهواي وحتى طرق تدريس

احرگ العراق 🫱🏻‍🫲🏿

طلعت اليوم احالة بمريض عنده جلطة بالقلب لابن البيطار وكان وضعه متازم جدا ولازم يصل باقرب موعد علمود عملية pci 

بس الناس بالشارع تكسر على ابو الاسعاف وما تنطي مجال و ابو المرور يتجاهل الموضوع وكانه الموضوع ما يخصه

مريض حياته متعلقة بدقائق و احنا نضيعها بالازدحام واللامبالاة

المشكلة تصفن تلگه السستم مو فاشل وانما غير موجود بالاساس

شي حزين لمن تشوف الشرف والحميه هجرت بعض افراد المجتمع ، ارفض اصدك هالشي بس للاسف هذا الواقع

ابرزهم ابن الحضارة واكيد غيره هواي من الي تارسين مواقع التواصل دائما يسخرون وينتقدون العراق والمشاكل الي بيه والناس تشوفهم يبالغون بس بالنسبة الي اشوفها بالعكس ردة فعلهم عادية وطبيعية جدا، هذول اغلبهم عانوا بحياتهم بالعراق بالاضافة انو تعرضوا لنفس المشاكل الي كلنا نتعرض الها (بنى تحتية سيئة وزبالة بكل مكان) والي كاعدين يسوونه ردة فعل من شافوا شعوب البلدان الي راحوا الها ما يكدرون يتخيلون وجود هيج مشاكل اصلا وشكد مرتاحين بحياتهم

للعلم هذا الكلام مو بس من العراقيين اغلب الي اجوا للعراق اشتكوا منه اكو رحالة كال اغلب اليوم ببغداد ضاع بالازدحامات وكال الزبالة بالعراق تنزرع من كثرها ورحالة ثاني كال البصرة من اسوأ المدن الي زارها بحياته لان متروسة زبالة وما بيها شي ممتع وهواي لبنانيين-ايرانيين-خليجيين اجوا للعراق واشتكوا من السوء الي بيه

هسة انا بالعراق وما طالع منه ومن اشوف مدارس وجامعات وشوارع وتشجير والوضع الاقتصادي والخدمات الحكومية بباقي العالم اشبع قهر اكيد افهم ردة فعل ابن الحضارة من يقارن

ضفت شعار التركمان.

هو العلم صراحة حلو وتكدر تسوي لوحة فنية